Aruba no a logra yega na un acuerdo riba introduccion di Rijkswet Aruba Financieel Toezicht (RAft) pa dia prome di september manera Hulanda a bisa. Naturalmente esaki ta trece consecuencia cu ne. Ya caba Gobierno di Aruba a ricibi un carta di Secretario di Estado Alexander van Huffelen, di cual ta e siguiente paso: Cuminsa cu e proceso di repago mientras cu ta sigui toch en busc di otro solucion.
Prome cu e fecha a yega, ya caba e politico y mandatario Hulandes a indica cu e kier yega na un “hybride oplossing”. “Esey caba ta un apertura,” prome minister Evelyn Wever Croes a bisa diahuebs mainta den Parlamento.
Sinembargo van Huffelen mientrastanto a manda un carta pa Gobierno di Aruba unda oficialmente ta bisa cu e fecha di prome di september a pasa y mester cuminsa traha riba e documentonan pa cu e fecha di 10 di october, cu ta e fecha ultimo pa Aruba paga e debe cu Hulanda bek.
Den cuadro di e ultimo desaroyo aki, van Huffelen a propone pa yega prome na un acuerdo pa paga e placa presta, pero pa sigui na mesa di negociacion. Si pa e fecha di prome di januari, 2024 yega na un compromiso entre Gobierno di Aruba y Gobierno di Hulanda, den cual ta regla un control financiero structural, e ta dispuesto pa laga e interest ta esun mas abou y no e casi 8 porciento.
E ariba menciona ta nifica cu mester sinta awo na nivel di ambtenaarnan y stipula con e repago di e prestamo cu Aruba a haci lo bay ta.
Den e siguiente edicion di TREMPAN tin un articulo mas amplio.
