Parlamentario Arthur Dowers a mustra cu no ta fraccion di AVP so ta mira cu Aruba tin na e momentonan aki, un stempel parlamento, cu tin cu haci y keda keto ora c’un minister bin pariba na Parlamento.
Pa colmo no solamente Minister Otmar Oduber ta bin pariba na parlamento pa duna informacion riba su maneho, pero e minister ta determina ki ora ta yama reunion, e minister ta ordena ki ora ta para reunion, e minister ta ordena kico parlamento por haya na informacion y pa completa obra, ta minister Oduber ta dicidi cual mocion e tres fraccionnan tin cu traha y cu nan tin cu aproba esaki tambe.
Parlamentario Dowers a sigui mustra cu algun dia atras e por a scucha un periodista liga na partido MEP, cu kende no tur ora su persona ta di acuerdo cu su ponencianan, pero kende tambe a cuestiona siman pasa e forma con fraccion di MEP ta wordo manipula y maniobra pa minister Oduber.
Stempel parlamento nan a bira por completo ya cu ta minister Oduber ta ordena pa pone un reunion publico pa e splica su maneho, e ta stipula dia y ora y ora cu e yega parlamento pa e reunion cu el a pidi, ta dicidi cu miembronan di parlamento tin cu haci pregunta na su persona pa un reunion cu el a pidi riba Serlimar.
“Ta mas cu claro cu ta un payasada e reunion ta bira, ta un tipo di wega di circo sin sentido y pa colmo ta mesun parlamentarionan di MEP cu un luna prome a cuestiona su maneho riba Serlimar y e intencion di cobra pa recogemente di sushi, awor ta sinta bati man, ta sostene mocionnan cu e minister kier mira aproba y simplemente ta permiti nan mes wordo uza.
A pone documentonan ter inzage cu practicamente no tin informacion adecuado pa parlamento y e minister ta duna un splicacion sin pida ni cabes pero ta wordo sostene pa fraccion geel.
Ta tristo pa mira con algun parlamentario ta haya cu minister Oduber a haci algo grandi, algo increibel ora cu el a dicidi di no cobra mas pa medio di e lista cu el a hinca den otro caminda e cobransa lo varia for di 90 florin pa luna te cu 0 florin pa luna pa esunnan mas vulnerabel.
Un cobransa cu lo a duna e minister un suma di 11 miyon florin extra riba loke ya caba gobierno tabata subsidia Serlimar pero awor a dicidi di cobra 25 florin cu en principio ya tin algun aña na vigor caba segun ley existente pero esaki lo duna e minister 10 miyon extra.
Pues un miyon menos di loke el a spera di ricibi dos luna pasa y tur esaki fraccion di MEP ta haya algo heroico, algo grandi sin cuestiona e hecho cu Serlimar ta ricibi subsidio di gobierno pa e cubri su gastonan operacional.
Aki por mira e sistema y mentalidad di minister Oduber cu pa hopi tempo caba ta conoci cerca nos di AVP sigura ora cu nos tuma nota cu hasta turistanan lo tin cu bay paga pa cubri recogemento di sushi cu 10 dollar extra.
Ta mesun minister aki den su tempo den gobierno di AVP como minister di turismo, ta practicamente rementa ora cu a bin cu a sugerencia pa cobra turistanan e suma di 1 dollar pa recogemento di sushi gritando cu esaki lo afecta e industria turistico.
Awe cu Otmar Oduber no ta minister di turismo mas, awor e ta bin cu e idea aki pero na luga di 1 dollar el ta insisti pa cobra turistanan 10 dollar adicional caminda aki pueblo por mira con e minister despues di a hinca su ATA bank den otro, awor ta creando su Serlimar bank pa asina e tin placa na su disposicion pa haci loke cu e kier.
Tur esaki cu bendicion y sosten di fraccion di MEP cu continuamente ta papia di un era nobo, di politiconan hoben cu tin otro pensamento, pero cu ta wordo manipula den parlamento pa un minister Oduber cu ya tin e debilidad di e fraccion geel aki bou dominio total,” Parlamentario Arthur Dowers a splica.
