Un punto importante cu Armand Hessels, presidente di Fundashon Gobernashon di Calidad Aruba (Stichting Deugdelijk Bestuur Aruba) pa por trece dilanti un observacion di parti di hopi hende den comunidad cu ta bisa cu e ultimo aña y mey, e fundacion a keda hopi keto.
A bisa di antemano, net prome cu e ultimo eleccion, unda cu a trece dilanti cu a caba cu e prome fase di conscientisacion. E fundacion a tene charla, simposio, a skirbi un cantidad di articulo, a traha video, simplemente cu e intencion pa conscientisa comunidad di Aruba riba henter e problemanan riba tereno di calidad di gobernacion.
A caba cu e parti aki un tiki mas laat pasobra mester a warda e publicacion y e presentacion di e rapport di National Integrity System, cu a tuma luga aña pasa na april, na Universidad di Aruba, segun Hessels. Despues di esey a cuminsa cu e di dos fase, unda cu a bin cu cos mas practico, pero nan no ta bay den publicidad.
E prome biaha cu a bin den publicidad ta awo, a base di algun carta cu a skirbi pa gobierno, tanto pa prome minister, como tambe na minister di integridad. E prome carta cual Hessels a comenta riba dje ta p’e minister di integridad, tocante e cuestion di corupcion, pero hopi mas importante tambe ta di mal gobernacion.
Comunidad ta fiha riba e cantidad di caso di corupcion cu tin. Hessels a menciona uno di 2002 di fondo di Desaroyo Nobo San Nicolas, cu a keda hopi tempo keto, no ta pasobra cu no tabatin corupcion, sino cu Ministerio Publico mes, pa motibo di casi persecucion y acusacion riba Ministerio Publico, cu nan ta haci trabao indebido, cu nan ta comete persecucion politico, cu e ora ey Ministerio Publico a manera distancia di esaki.
Pero ultimamente por a mira atrobe, fo’i 2017, cu caso a bin dilanti. Entre otro caso Ibis, Avestruz, Flamingo, Diamanta, Cucuisa, Arubahuis, Kwihi, etc. Tabatin otro caso, no cu politico envolvi, pero tambe cu hende den gobierno cu a haya hopi atencion, manera Landslaboratorium unda cu 10 miyon florin a disparce, den enseñansa cu beca, caminda mas cu un miyon a disparce y tambe e caso di vacuna-gate (Anglo).
Tur hende ta fiha riba e problematica di gobernante, politico cu ta comete corupcion y naturalmente e tin consecuencia p’e credibilidad y confiansa cu hende por tin den e politico, cu ta masha abao, loke por a mira den encuesta di Banco Central. Pero tambe naturalmente tin consecuencia financiero.
Den esey tin un punto di bista hopi diferente. Segun Hessels, en berdad corupcion di parti politico ta hopi serio, e ta masha malo mes p’e confiansa cu pueblo por tin den politica, pero hopi mas serio t’e daño financiero pa motibo di otro aspecto di mal gobernacion cu ta por ehempel patronahe politico, cual t’e mal maneho di finansa cu t’e maneho den proyecto. Y asina tin otro aspecto di mal gobernacion cu no ta hala atencion di comunidad, pero si tin efecto hopi mas serio riba tereno financiero pa gobierno.
