Minister demisionario mr. Andin Bikker a anuncia recientemente cu e weekend aki lo intensiva control di polis riba caya. Ta locual a sosode tambe diabierna anochi. Y awe diasabra e controlnan a cuminsa for di 4:00 pm y lo sigui te cu 4:00 am. Meta di accion aki ta pa; confisca mas hopi arma y droga posibel for di caya. Na mes momento evita cu chauffeurnan burachi ta stuur auto.
Na Savaneta na altura di La Granja, polis a detene varios chauffeur, sea nan tabata betra of no tabatin un rijbewijs valido. A confisca varios auto, a topa cu arma blanco y droga durante e control di trafico aki.
A para varios auto, cu autorisacion di e automobilistanan a controla den nan auto pa check si ta topa cu artefactonan ilegal. Mayoria chauffeur y nan pasahero a coopera cu autoridad.
Nos a combersa cu algun di nan tambe, un automobilista a conta nos cu: “Si bo no tin nad’i sconde bo no mester preocupa.” Esey tabata un chauffeur cu nan a baha tur hende for di auto pa un control. E homber a conta nos cu el a sali cu su pareha pa nan bay cobra placa di sam y na caminda bek pa cas a topa cu control.
Cu cooperacion di Cuerpo Especial Arubano (CEA), a transporta e detenidonan pa ward’i polis. Ey tin un subfiscal pa atende cu tur e sospechosonan y pa e dicidi si nan ta keda encarcela of por bay cas despues di ricibi un proces-verbaal.
