Aña ta pasa y no a haya ningun compania interesa den operacion di e refineria. Pero mas importante cu esey ta awo, tin otro plannan pa henter e area unda e refineria ta poni. E pregunta ta: Kende ta responsabel pa desmantelacion y limpiesa di henter e facilidad di e refineria na San Nicolas.
E ta importante pasobra e ta encera un suma grandisimo cu esaki lo bay costa y cu gobierno no tin placa reserva pa esaki, segun ta aparece den un rapport di Contraloria General.
No tin claridad riba loke e limpiesa di e tereno lo bay costa na e momentonan aki. Si yega un momento cu mester desmantela e instalacionnan, lo mester haci e tereno limpi ya cu esaki ta sushi. Pero e pregunta cu ARA ta haci den su rapport ta con lo bay costea esaki mirando cu den e dos acuerdonan cu tin firma door di pais Aruba (2016 y 2020) a exonera e partidonan externo di e consecuencianan financiero pa limpiesa di e tereno di e refineria.
A exonera Valero na 2016 di su obligacionnan ambiental, bou di e condicion cu nan deposita un suma di 19 miyon florin cu lo bay pa e asina yama ‘milieuherstelfonds’.
Na momento di traspaso di e propiedadnan na RdA, a pasa e suma di placa aki tambe como parti di e ‘Transfer en Settlement Agreement”.
Segun statuutnan di RdA, for di e ganashi bruto di tur aña mester kita un suma pa hinca den e fondo di desmantelacion, pa e “milieuherstelfonds’.
Tambe e statuut di RdA ta bisa cu e ganashi di e empresa estatal aki ta bay na disposicion di AvA (Algemene Vergadering van Aandeelhouders), despues cu a tene suficiente cuenta cu e reservanan pa e fondonan ariba menciona.
Tambe ta menciona eyden cu si resulta cu tin añanan unda cu tin perdida, cu no por wordo cubri door di reservanan of otro forma, den e siguiente añanan no ta entrega e ganashi tanten cu no recupera e perdida. Di e investigacion di ARA a sali afo cu RdA nunca a kita pa reserva for di e ganashi bruto, debi na e situacion financiero precario di e empresa estatal.
Den 2018 tabatin resultado positivo, pero bayendo contra e articulonan di statuut, no a reserva nada.
Loke cu tambe a hala atencion di ARA ta cu apesar di e perdidanan di RdA y cu no ta haci reserva pa e fondonan, gobierno si tabata presupuesta loke e mester haya na dividendo y ta responsabilidad esaki den cuenta anual di pais Aruba tambe.
Pa loke ta e reservanan pa cu desmantelacion y ‘milieuherstelfonds’, e cuentanan anual di RdA di 2017 ta indica cu a crea un provision pa e dos fondonan y tur aña ta procesa e cambionan.
E ta wordo presenta di e siguiente forma:
E provision pa desmantelacion y recuperacion di e area ta poni na cuenta di capital propio, ‘agioreserve” en bes for di e post di operacion.
Agioreserva ta e diferencia entre e balor di e activonan cu e accionista a contribui cu ne na e empresa y e capital nominal di accionnan. E balor cu a cuminsa cu ne tabata e propiedad refineria y tugbootnan cu ta 225 miyon florin; stationnan di gasolin cu FMSA ta huurnan cu tin un balor di 7.7 miyon florin. Mester kita di loke e trabou di limpiesa mester costa cu ta 69.4 miyon florin y deposito di activo di e accionista cu ta 19 miyon florin.
Esaki ta un forma administrativo pero no ta nifica cu e pone placa un banda pa e trabounan di desmantelacion den futuro y limpiesa.
Un investigacion haci na 2021 ta mustra cu e gastonan di limpiesa lo ta rond di 41,6 miyon florin. E gastonan di desmantelacion y limpiesa hunto lo yega den algun shen miyon florin. RdA no tin e placa na su disposicion pa costea esaki. No sa tampoco kico ta e balor actual di e refineria, mirando cu no tabatin mantencion haci e ultimo añanan.
RdA en realidad no tin un fuente di entrada, ni via di e empresanan cu ta cay bou di dje. Yen di acontecimento a stroba e posibel reapertura di e refineria. Mester bini un decision lihe mirando e estado den cual e ta awo.
A mustra cu Minister di Energia na diferente ocasion a anuncia plannan pa e refineria. A papia di transforma esaki den un Aruba Hydrogen Valley, maar e no ta concretisa. Esaki ta haci cu e propiedad ta keda bira bieu cu ta un peligro tambe.
Pero e preocupacion mas grandi ta con ta bay desmantela y haci e luga limpi mirando cu den dos acuerdo a exonero e partido externo di consecuencianan financiero pa sanea e tereno di e refineria.
