Diaranson a tuma luga apertura di e exhibicion “Balance” den e espacio entre Bodytech y Op=Op den Italiestraat, di e artista Grace Ashruf Rahusen. E ta conta cu ya for di 2003 e tabata tene su exposicionnan solista na Aruba.
Awo un biaha mas, despues di algun aña el a bolbe expone. E ultimo tabata na New York y Miami, cu tabata sumamente exitoso.
Awo e ta contento cu un biaha mas el a haya chens pa expone su obranan na Aruba. E coleccion aki ta bay riba e tema di Balance. E ta bay riba Life, Live & Living. Ta trata aki di Balans den bida, cual el a purba di enfoca den su cuadranan. Cada biaha bo por mira un circulo. Riba e superficie un circulo ta nifica e solo y e luna, cu semper ta bin p’adilanti den nos bida.
Pero profundamente e tin un otro nificacion spiritualmente. Si nos kier logra algo den bida, ta keda ilustra den e cuadranan como un solo como un meta. E bushstrokes cu ta bay ariba direccion e solo, cual e ta ilustra nos forsa humano cu semper nos kier uza pa asina alcansa e meta aki den nos bida.
Esey ta un forsa poderoso y universal cu tambe ta forma e balance entre e solo y luna, pa asina tambe logra yega na e exito.
Grace ta uza hopi acrilyc. Tambe hopi mescla manera pasta, of self-made pasta como base, cual e gusta masha hopi. E ta cuminsa su cuadranan poniendo textura prome cu e cuminsa cu color. Asina e proceso ta cuminsa.
E exposicion di Grace Ashruf ta te cu dia 4 di december pa un siman y ta habri for di 1’or di merdia te cu 7’or di anochi tur dia.
