E fraccion di partido MAS cu ta consisti di drs. Marisol Tromp y Aquanette Gunn a haci un serie di pregunta cu ta relaciona cu e presupuesto di DOW pa 2024. Den un parti di e pregunta nan ta cuestiona e falta di recurso pa mantencion di careteranan.
E miembronan di e partido M.A.S. representa den parlamento ta haya straño e presupuesto chikito cu a reserva pa asfaltamento di caminda pa loke ta aña 2024.
Nan a tuma nota cu e camindanan di asfalt na Aruba ta den un estado masha malo mes. Nan ta haya cu esaki ta masha tiki mes mirando cu e camindanan ta laga hopi di desea. E ta trece e riesgo cu ne cu gobierno cada mes mester para responsabel pa daño na autonan debi na e mal estado di caminda.
Nan a tuma nota tambe e remarca di Raad van Advies cu ta haya 28 miyon na impuesto di vehiculo. Esaki ta dies biaha mas hopi cu loke ta reserva pa mantencion di careteranan. Nan kier sa pakico un suma chikito ta wordo presupuesta si ta papia aki di hopi riesgo di gasto cu e ta trece pa gobierno. MAS kier sa a base di kico ta yega na e suma cu ta reserva pa mantencion di camindanan.
Segun gobierno, e criterianan ta diferente, manera e importancia di e caminda, e mantencion necesario, e intensidad di trafico, e frecuencia di e reparacionnan pero tambe con bieu e caminda ta.
