Durante segundo dia di Foro Nacional pa Adulto Mayor, Anselmo Pontilius, mediador di gobierno, ta bisa cu dialogo ta un necesidad pa guia un pais, e no ta un fabor. Mester dialoga pa tuma un decision pa nos sa unda nos ta bay.
Den presupuesto 2024 pendiente pa atende den Staten, mester bin un suma pa atende cu ouderenbeleid. Consecuentemente aki ta e momento pa pone 10 miyon florin un banda pa atende cu e 30 mil persona di edad cu Aruba ta carga.
Pa logra haya e pensionado, convence e pensionado di e poco cu e ta haya pa e pone 10 florin tur luna. “Bo no por haci’e obligatorio, lo bo tin cu bay haci’e manera miembro di cooperativa,” segun e mediador ta splica. Loke ta mas importante ta e trahado cu ta traha awe mester mira mediante un ley pa cada trahado paga 10 florin. Y e trahado cu lo paga 10 florin, lo ta contribuyendo tambe na su propio bienestar ora e yega edad grandi. Ora mira e sumanan cu yega na dje, contando 50 mil trahado sin conta esnan cu no ta registra trahando zwart, lo por yega casi 20 miyon pa aña.
Den e caso di yamado club di ariba 60 aña, mester corda cu pension ta awor na 65 aña y p’esey ta un punto importante pa tene cuenta cu esaki, na tur dunado di trabao cu mester tene cierto cos den consideracion, no por tin discriminacion pa motibo di edad. Pa atende cu e parti riba kico nos poblacion di adulto mayor lo haci nan mes, ta hopi importante pa sa con lo financia gastonan.
Un percentahe grandi di e ciudadano cu tin 65 aña of mas cu ta sigui traha, e tin un fuente di paga remedi cu no ta haya pago pa esaki, bon di cuminda mensualmente of semanalmente. Tin un percentahe tambe di ciudadano cu tin menos di pension di 1200 florin.
E proposicion ta pa percura pa den seis districto di nos pais tin instalacion di cooperativa, cual ta Relga den nos leynan. Exigencianan fuerte pa loke ta funcionamento di un cooperativa, cu participacion di e propio pensionadonan Arubano. Esaki ta pa haci lo maximo na su alcance pa yuda e adulto mayor den tin un miho calidad di bida posibel. Con ta haci esaki: Vocifera y canalisa tur locual ta toca e adulto mayor, cu ta haci su bida menos agradabel. Y tambe yuda caminda ta necesario y posibel. “Pa nos yega eynan ta nifica cu lo tin cu tuma decision concreto riba ken ta bay cana e caminda, esey ta e dunado di trabao, sindicato, gobierno y otro instancianan.”
Anselmo Pontilius a propone mesora tambe durante e Foro Nacional pa mediante un decreto ministerial instala un comision mixto pa atende cu esaki. Gobierno lo mester percura pa tin algun fondo necesario pa canda e caminda aki debidamente. Ta invita pensionado di cada districto, nan ta eligi nan representante, consecuentemente por lo menos eynan bo tin autoridad pa cuminsa cana.
Si no nombra un ekipo dinamico pa percura cu cosnan ta tuma lugar, nan no ta bay pasa. “Un apelacion na e gremionan: no bay drumi! Pasobra nos ta campeon tambe di bay drumi y despues jora cu gobierno no a haci e.” Pontilius a exigi pa pone un fecha riba ki ora lo bolbe bek hunto despues di e Foro pa wak con leu a yega, pa keda critico cu otro percurando pa cosnan berdaderamente pasa.
