Recientemente drs. Andy Lee tabata di bishita cerca Presidente di Parlamento, mr. Edgard Vrolijk. Ta den cuadro di su nombramento como e proximo representante di Aruba den Raad van State. El a reuni un bon ora y mey cu Vrolijk den un oficina cu e conoce di cerca. Lee, antes tabata parlamentario pa AVP den oposicion y na aña 2009 hasta a bira presidente di parlamento.
Tin cu bisa cu e ta un persona carga cu conocemento politico, diplomatico, comercial, den cifra y riba nivel di duna conseho.
Na final di e reunion, Lee a topa cu un representante di Headlines Group ta ward’e p’un entrevista. El a comenta cu e tabata sorprendi cu su nombramento. Ta algun luna pasa cu Gobernador di Aruba a acerc’e y puntr’e si e ta dispuesto pa ta un candidato p’e funcion pa Raad van State. Lee tabata un di e tres candidatonan cu a ricibi yamada for di Gobernador. El a acepta pa ta un candidato y djey a sigui cu e proceso di nombramento. E nunca a pensa cu un dia e lo por ocupa e funcion aki.
Despues di hopi combersacion cu Gobernador y despues cu vice-presidente di Raad van State, na final a sigui e proceso pa nombr’e den e funcion aki. E proceso a tuma su tempo. Tanto Gobierno di Aruba (MEP-RAIZ), Gobierno di Reino y Ministerio di Asuntonan Exterior a duna un bon palabra pa nombra Lee como e proximo representante den instituto aki.
E reunion cu Vrolijk tabata uno fructifero. Ta importante pa haya un idea riba su punto di bista y pa semper keda den bon contacto cu otro, mas ainda awo den e funcion pa duna conseho. E ta sinti su mes masha orguyoso pa cu e funcion aki.
Lee a comenta cu e conoce Aruba basta bon, tanto riba nivel di cifra, duna conseho y gobernacion, e sa con cos ta cana y ta hinca den otro. E ta spera di por conta cu bon contacto na Aruba mes p’asina e por haci su trabou miho posibel.
E funcion riba su mes ta encera hopi riba e asuntonan den Reino Hulandes, pa cual Aruba ta forma parti di dje. Mirando su conocemento amplio tanto den sector publico y priva, e lo sa di duna bon conseho so pa cu impacto pa Aruba. E sa e dolor, e ta mir’e den cifra y realidad y ta cla pa asumi e funcion aki.
Tocante Andy Lee
Andy Lee a studia politieke wetenschappen n’e Universidad di Amsterdam y na Erasmus Universiteit Rotterdam. Entre 1995 cu 2005 el a fungi como director di CBS djey el a subi lista di AVP y entre 2005 pa 2009 e tabata parlamentario pa e fraccion berde, e tempo ey den oposicion. Asina cu AVP a gana eleccion na 2009 a nombr’e como presidente di parlamento. Entre 2012 cu 2014 el a ocupa e funcion di director di Dienst Buitenlandse Betrekkingen (DBB).
Mesora su tras, AVP a nombr’e como minister plenipotenciario na Washington. Entre 2018 cu 2020 el a fungi como consehero p’e gobierno di MEP-RAIZ. Entre 2021 cu 2022 el a asumi e funcion di hefe di e departamento di investigacion na CBS. Djey na maart 2023 el a lanta su propio negoshi caminda ta duna conseho y bende cas. Awo, a nombr’e como e proximo representante di Aruba den Raad van State. E ta sucesor di Mildred Schwengle .