Den un ambiente di fin di aña, staf y personal di Headlines Group, e cas editorial di 24ora.com y TREMPAN a cende nan pagara pa despedi di aña 2023. A haci esey den Wilhelminastraat, na e oficina nobo situa na di dos piso den Layex Building. A honra e dos empleadonan Leo Geerman y Benny Lee pa cende e pagara. E coleganan a vota pa nan dos como e empleadonan di mas ehemplar. E directornan Mark-Benson Denz, Nelson Andrade y Patrick Paskel a yama tur empleado danki pa e sosten incondicional durante henter aña.
Un grupo di invitado, entre nan clientenan y amigonan di e medio di comunicacion di mas grandi di Aruba, a atende e evento. Claro cu na final Vicente Tromp a canta e Dande tradicional y su tras a cende e pagara pa core cu fucu.
Tocante e crecemento di 24ora.com
Na aña 2022 a raporta un crecemento di 33,59% den audiencia riba e website mas mira di Aruba. Tambe a nota desaroyonan importante den cambio di comportacion di usuarionan, por ehempel e pagina mas mira ta e frontpage di 24ora pero e di dos pagina mas mira a bira anuncio di morto, sigui pa suceso y despues e pagina cu noticia local. Riba Facebook tambe 24ora ta raporta un crecemento impresionante! A cera aña cu no menos di 119.591 likes riba Facebook, mientras cu e cantidad di siguido (followers) tabata 165.977. Riba Instagram tin 19.726 siguido. Cifranan aki ta marca un crecemento grandi compara cu e aña prome. Den video ta raporta cu e aña cu a transcuri, usuarionan a mira 80.9 miyon minuut di video riba Facebook, cu ta traduci den 11.3% menos cu e aña anterior. Esey por tin di haber cu awendia ta publica videonan riba Youtube pa bay riba e site y riba Facebook ta keda separa. Di otro banda Youtube a sigui crece. E videonan miho mira ta di februari y maart di e aña cu a termina. Esun miho mira ta dia 11 di februari 2022, pa buskeda pa un persona cu a agredi chauffeur di bus y core bay sconde den hotel. A mira 1.272.962 minuut na video. Un total di 776K usuario a mir’e. Esun mas mira ta di 20 di maart 2022, di un brommer di coriente cu a pega candela den un parada di nos Dia Nacional. Un total di 914.466 usuario a mira e video aki! Entre e videonan miho y mas mira ta tambe e edicionnan di Enfoke di merdia.
Trempan ta creciendo
Den transcurso di aña 2020, a start cu e corant digital Trempan. Esey ta conkistando un otro mercado, di usuarionan cu ta prefera noticia den un forma ordena tras di otro den forma di un corant. Ta presenta un corant yen di contenido, cu video den dje y masha moderno. Un publico grandi a acept’e y a cambia di e corant tradicional, cu hopi biaha ta yena di noticia cu a lesa online caba, pa lesa Trempan cu ta yena di noticia fresco. Produccion di Trempan ta den man di un ekipo separa di profesionalnan den media.
Tocante 24ora.com
Mark Benson Denz a funda e prome website di noticia na Aruba, 24ora.com (Prome den Noticia) dia 28 di maart 2007. Awendia e ta e medio di comunicacion di mas grandi na Aruba. Diariamente mas di 50 mil diferente usuario ta subi online, mas di 4 biaha y ta keda casi 3 minuut cada biaha. Pa siman ta surpasa 100 mil usuario y pa luna e ta mas di 250 mil diferente usuario. Riba Facebook nos ta e pagina di Aruba cu mas “likes” (123K), cu mas di 187K followers y tambe cu mas “engagement”.
