Diabierna mainta y na un forma spontaneo, amigo y coleganan di e fayecido cantante Etty Toppenberg a bini hunto den studio di transmision di Canal 90 pa brinda e leyenda local un merecido homenahe postumo.
Robert Maduro, Juancito Giel, Juan Carlos Giel y Stanley Dabian a bay tras di microfoon pa expresa nan pensamento y sentimento pa cu e perdida grandi aki pa cultura y farandula di Aruba.
Jonathan Lake, kende normalmente tin su programa ‘Ta Su Ora’ den e espacio ey di mainta, gustosamente a duna esaki y te hasta a yuda den coordina e tocamento di tema y pone e diferente yamadanan cu a drenta, den aire pa un termino total di cinco ora.
Durante esaki, diferente figura di nos isla, den e region y rond mundo a probecha pa expresa públicamente nan duele y condolencia na casa, famia y sernan keri di Etty. Tabatin yamada for di Hulanda, mescos cu palabranan en bibo di Tony Sherman for di Corsou y Jossy Brokke, entre otro, na Aruba mes.
A tuma e ocasion pa pidi algun di nan comparti cu siguidornan di 24ora.com y lectornan di TREMPAN kico ta e legado di Etty Toppenberg. E musico y cantante cu 65 aña di trayectoria, a fayece diamars 13 di september tras un lucha largo cu salud.
Pa e relato completo, lesa TREMPAN
