Den un ceremonia cu a tuma luga diabierna anochi, a inaugura oficialmente e Centro di Comando nobo di Cuerpo Policial, marcando asina un logro significativo den e evolucion di siguridad y desaroyo tecnologico di e isla. E centro moderno aki di operacion ta priminti eleva e nivel di siguridad y eficiencia den Cuerpo Policial di Aruba.
Altocomisario drs. Ramon Arnhem a comparti su entusiasmo bisando cu nan ta hopi contento cu e proyecto nobo aki. Ta un avance importante pa nos hendenan y un desaroyo significativo den e modernisacion di e sistemanan operativo.
Un proyecto di innovacion y modernisacion
E Centro di Comando, ekipa cu lo ultimo di tecnologia, ta diseña pa mehora e siguridad riba henter e isla. Durante e inauguracion, a destaca e instalacion di multiple camara di vigilancia den e areanan clave, manera e zona di hotel y e cayanan di San Nicolas, Rembrandstraat y Caya Captain Rodgers. “E meta di e sala di camara aki ta pa garantisa e siguridad di nos pais y di nos hendenan,” Arnhem a splica. “Nos kier pa Aruba ta reconoci pa su siguridad moderno.”
Reconocemento n’e pioneronan y e generacion nobo
E ceremonia tambe a conta cu presencia di e oficialnan di polis hubila (e pensionadonan) y e klas nobo di polis, destacando e importancia di ambos gruo den e construccion di un base solido p’e futuro di siguridad na Aruba. “Nos pensionadonan y e klas nobo ta fundamental p’e fundeshi riba cual nos ta para awe. Nos tin un gran respet pa nan,” Arnhem a afirma.
Futuro di siguridad na Aruba
E compromiso cu e modernisacion no ta para den e centro di comando nobo. A anuncia plan di incorpora mas bodycam p’e oficialnan, cu e obhetivo di aumenta e siguridad tanto di e polisnan como di e ciudadanonan. “E bodycamnan no solamente ta p’e siguridad di nos coleganan, sino tambe pa sigura cu tur e procesonan ta transparente y eficiente,” Arnhem a bisa.
Un mensahe di speransa y gratitud
Arnhem a expresa su speransa cu e proyecto nobo aki ta un exito rotundo. El a gradici su coleganan pa nan dedicacion y esfuerso den e realisacion di e centro di comando, destacando e importancia di e instrumento aki den e garantia di e siguridad y e ehecucion eficiente di trabao policial. “Innovacion ta clave y e inteligencia artificial tambe ta presente akinan. Pero e obhetivo final ta pa garantisa siguridad y mi ta kere cu e centro aki ta un bon herment pa logr’e.”
Cu e inauguracion aki, Aruba no solamente ta reforsa su compromiso cu siguridad, sino cu tambe ta posiciona como un lider regional den e adopcion di tecnologia avansa pa bienestar di e comunidad.
