Esequibo ta un region den disputa entre Venezuela y Guyana desde e epoca colonial. Den e ultimo temponan el a bolbe bira tema di noticia desde cu a descubri importante reservanan di petroleo na 2015. Den fin di siman ultimo, Venezuela a tene un referendum, cual segun e Gobierno di Nicolas Maduro, e SI a sali triunfado.
Secretario di Estado drs. Alexandra van Huffelen a bisa cu e ta na altura cu Venezuela a tene un referendum pa cu esaki. E ta spera cu no bin un conflicto den e region cu lo por pone e stabilidad y siguridad di e islanan ABC na peliger.
“Mundo ta yen di conflicto caba y e ta spera cu esaki no bira uno mas,” Van Huffelen a indica. El a sigura un biaha mas, cu Hulanda ta cla pa defende e islanan, pero cu e ta spera cu esaki no ta necesario.
ESEQUIBO
E region aki no solamente tin reservanan amplio di petroleo, pero tambe di oro y otro mineralnan manera carbon y piedranan precioso. Ademas, e ta un importante reserva di flora y fauna, pa cual tanto Venezuela como Guyana ta reclam’e como zona economico exclusivo.
Siman pasa diadomingo, Gobierno di Nicolas Maduro a tene un referendum pa sondea bou di e pueblo tocante e sentimento pa cu Esequibo, si e ta forma parti di Republica Bolivariana di Venezuela. Segun e Conseho Nacional Electoral (simpatisante di Chaves y Maduro), “Si” a gana di manera abrumador. Ta importante pa remarca cu e resultado di e referendum no ta
Corte Internacional di Husticia, su sede na Den Haag, a informa e Gobierno di Venezuela pa e no haci nada pa modifica e status di e teritorio, di 160 mil kilometer cuadra y rico na petroleo y mineral, adminstra de facto door di Guyana, mientras ta dicidi riba e controversia di e limitenan.
NATO
Un posibel conflicto invasion Venezolano lo haci cu Hulanda lo hay’e envolvi den e conflicto, ya cu e lo sali na defensa di e islanan ABC. Un conflicto cu lo trece instabilidad no solamente cerca e paisnan bisiña, pero tambe lo tin un efecto grave pa e islanan ABC.
Den caso di un invasion, ta importante pa sa cu e zona den reclamacion ta mas di mita di e teritorio Guyanes.
Ta di remarca cu den caso di un invasion di parti di Venezuela, e lo haya e apoyo di China y Rusia, mientras cu Guyana lo conta cu e apoyo di Merca.
Hulanda ta forma parti di NATO y pa cual Aruba, Boneiro y Corsou tambe lo por haya nan envolvi den un conflicto sin cu ta necesario y lo haci di nan blanco di un conflicto militar.
