Durante su bishita na Aruba, Dr. Alex Schwengle a duna su opinion tocante e panico cu tin rond pa loke ta trata e Omicron.
Como dokter y specialista di pulmon Dr. Schwengle ta comenta cu nunca ta bon pa tin panico, semper mester sinta evalua p’asina y haci bo escogencia a base di e miho ciencia cu por tin. Pues, una bes un persona bay den panico, tin chens cu lo por hiba un maneho a base di miedo of pa beneficio personal di cierto hende y esaki no lo ta un un bon maneho.
Si bay bek den tempo, Coronavirus no ta nada nobo. Pa varios aña caba e ‘common cold’ of un di e virus cu ta ocasiona e resfriado, niester y friu di cabes, Coronavirus tabata dun’e pa varios aña caba, ta referi na esaki como e corona humano. Loke a sosode ta cu e Coronavirus a haya mutacion, pues su material genetico a cambia.
E cambio a genera un MERS-CoV ( Middle East respiratory syndrome coronavirus ) den aña 90 y esun cu nos conoce awo cu ta e SARS-CoV (severe acute respiratory syndrome coronavirus ), awo nos conoce e tipo 2 cual ta e Delta. E Delta ta esun cu mas mortalidad a causa te cu awo, prome cu esaki nos a conoce e mutacion cu a bin fo’i Wuhan, te cu el a sigui muta y a haya e variacion Delta. Tin hopi otro mutacion, pues no ta cu Omicron a cay for di shelo.
Constantemente e virus ta cambia di material genetico. Pa loke ta e Delta, el a cobra mas di 5.6 miyon morto caba den dos aña di tempo. Dr. Schwengle ta bisa cu e unico arma cu nos tin te awo contra esaki ta e vacuna, claro e tenemento di distancia, tene mas limpi y e uzo di tapaboca ta yuda pero e vacuna ta keda e arma di mas importante cu nos tin.
E Omicron, ta plama masha lihe, pero e no ta ‘virolente’ manera e variante Delta. Esaki ta nifica cu e ta haci e persona contagia menos malo, manera por ehempel Pulmonia no ta prevalece mesun fuerte. Di un banda por bisa ‘let it be’ pasobra con cu bay bin ta tur aña nos diferente tipo di virus cu ta duna griep.
Griep ta reserva pa Influenza, no mester lubida cu Influenza ta mata alrededor di dos miyon hende pa aña na mundo, como tambe e daño economico pasobra hopi hende ta keda malo na cas y no por traha.
Dr. Schwengle ta bisa cu por mira e banda positivo di e Omicron, door cu e ta plama rapidamente e ta duna e variante Delta menos espacio pa eherce su daño. Si e Omicron bay manera un avalancha den e poblacion, na cierto momento Delta tin menos chens di causa e daño, pues na dado momento e pandemia lo stop.
