Diahuebs mainta, Corte di Prome Instancia a trata e caso Diamanta, caminda cu e ex-parlamentario pa partido POR, Allan Howell ta envolvi.
Na salida di Corte Allan Howell, ex parlamentario di partido POR a expresa su mes riba e caso (Diamanta) cu Ministerio Publico a formula contra dje. E acusacion ta desfalco y falsificacion di documento cu a tuma luga entre september 2017 y maart 2021.
El a bisa cu hamas el a spera di ta para dilanti Corte, como acusado, dunando un declaracion. E tin apoyo di hopi amigo y famia, “y cu ayudo di Dios ta sali di e situacion aki. Un situacion cu contrincantenan a hinca mi aden.”
Pero tambe e ta contento cu den e prome parti aki Hues a bay di acuerdo cu nan peticion pa scucha testigonan y ta lamenta cu e personanan cu tabata den e caso, pero cu a sacanan pa motibonan desconoci. “Ta mas cu husto cu e persona ey ta presente pa duna cuenta tambe.”
Howell a expresa su decepcion pa e forma con a hiba e investigacion, incluso decepcion den e forma di proceder di su mesun coleganan.
No tin fecha pa tratamento di e caso aki sigui, pasobra awo ta bay scucha e 8 testigonan cu defensa a pidi.
Pa un relato mas amplio, lesa e siguiente edicion di TREMPAN.
