Alan Howell a sali hopi contento y satisfecho di e combersacion cu e tabatin na Landsrecherche, unda cu e por a trece su banda di medaya, caminda cu el a bin cu tur documentacion, pa asina aclaria tur duda.
Manera cu el a pidi den prensa cu kier pa scuch’e mas pronto posibel pa e por trece su banda di medaya. E ta hopi contento cu Ministerio Publico a traha lihe cu e por a declara.
Ta importante pa por splica con importante ta p’e y e partido POR keda cla cu hecho mas lihe posibel. Tur hende sa cu eleccion ta den porta. Kier ta cla di tur mal informacion y nomber pa por tin riba dje.
E hendenan cu ta sostene Alan Howell y sostenedonan di POR kier pa nan bay eleccion y ta hopi pura pa por keda cla y campaña trankil y haya dos of mas asiento den Parlamento. Pueblo kier mira POR bek den gobierno. Pueblo sa cu partido POR a traha duro. POR ta un partido chikito den gobierno pa percura pa e parti di infrastructura, asfalta e barionan cu pa hopi aña a haya asfalt.
Miles di persona cu a warda pa tereno pa hopi aña, a logra haya nan tereno. Sin papia di nan representacion den Parlamento. Con duro a traha, biniendo cu diferente mocion, sosteniendo tambe pa e tempo cu a pasa aden, e crisis cu nos pais ta pasa aden, cu por a keda man den man pa percura pa Aruba sobrevivi.
Sin laga afo cu partido POR ta fuerte riba Aruba. Despues di tanto tempo den historia tin un lider di partido colo scur di pariba, esaki ta algo cu ta hopi fastioso. Esunnan den politica ta purba pa kibra pia di Howell pa evita pa nan mira kico ta bay pasa. Nan sa bon bon cu e eleccion aki, Alan Howell ta bay haci un cos no solamente na Aruba, pero en particular pa pariba di brug.
POR ta un partido di pueblo y no ta partidonan ta dicidi pa POR. Pueblo lo dicidi cuanto POR lo haya den e eleccion venidero.
Por ultimo, Howell a comenta cu malo no ta gana bon nunca. Dentro di poco lo sa y scucha kico ta e berdad di e caymento di gobierno. Pueblo mes tambe, dia 25 di juni venidero, lo sa di straf esunnan cu pa un motibo of otro a baha gobierno innecesariamente, lagando Aruba sin un gobierno den e tempo di mas dificil cu por tin awor aki.
