Por a tuma nota cu Aruba Food & Beverage Association tin un preocupacion di entre otro pa loke ta cupo di trabao cu tin di yena. Di parti di AHATA ta mirando cu tin un preocupacion tambe. Segun presidente y CEO di AHATA, Tisa LaSorte tin hopi aña prome cu pandemia mes, ta papiando cu tin hopi cupo di trabao habri y no tin hopi candidato cu ta bin aplica p’e trabaonan.
Despues di pandemia el a bira pio. Tin hopi tempo ta purbando di yuda cu e problema. Tin cierto cos por ta den nan control y ta purbando pa yuda unda cu por. A crea un website cu yama amitatraha.com cu ta yuda hende prepara pa busca trabao y prepara pa entrevista. Asina kier yuda cu e solucion di trece e dunado di trabao y e persona cu ta aplica pa trabao mas cerca di otro. AHATA ta kere cu tin hende eyfo si cu lo kier busca trabao.
AHATA ta haciendo diferente esfuerso. Tambe nan tin e campaña di “Ami ta turismo”, pa mustra cu tin hende orguyoso ta traha den e sector di turismo, pa atrae hende pa traha den e sector. Ta traha cu e scolnan y ta aporta hopi na diferente scol pa haci educacion mas accesibel y tambe pa tin un conexion cu e studiantenan, pa nan mira e industria un caminda cu nan kier bin, despues cu nan caba scol.
Tin hopi diferente cos cu ta purbando pa yuda cu e problema. Pero e realidad ta keda cu Aruba ta chikito y e cantidad di residente na Aruba ta keda chikito, compara cu e crecemento cu nos tin di trabao habri. Ya por mira cu na 2024 dos hotel mas ta planea pa habri. Esey ta nifica cu ta lo tin un centenar di trabao cu lo habri y un lo bay coy fo’i otro.
Si ta un cantidad di trahado so tin na Aruba, nan ta bay hala di un luga pa otro. E ora tur hende ta keda cu un cantidad di menos di trahado na trabao. Loke ta pasa e ora cu ningun hende no por duna servicio optimal y esey tin su consecuencia cu e calidad di servicio ta baha y e reputacion tambe ta baha. E balor di Aruba ta baha e ora como destinacion turistico.
Tin biaha ora cu papia di e topiconan aki tin hende cu no ta kere cu esaki ta un problema urgente y no ta compronde, pasobra ta un problema super urgente, segun LaSorte.
AHATA tin 150 compania como miembro. Tin ta directamente y tin indirectamente ta depende di turismo. Pero tur na final ta depende di e exito di turismo na Aruba. Si no tin trahado, no por ofrece servicio y e ta un urgencia masha grandi mes pa por yena e cuponan di trabao aki, pa Aruba por keda cu un reputacion pa keda un destinacion pa bishita.
Ta sinti cu mester tin mas preocupacion di parti di gobierno, di parti di e otro stakeholdernan pa mira kico por haci pa soluciona e problema aki cual ta uno masha grandi mes.
