Aruba Airport Authority N.V. a organisa exitosamente su Safety and Security Week anual cu a tuma lugar for di 24 di September te cu 28 di September, 2018.
E siman a inicia cu un ceremonia di apertura y un speech di AAA su CEO, Sr. James Fazio cu a elabora ariba e importancia di opera un aeropuerto cu e seguridad necesario y tambe e rol di cada usuario na un aeropuerto. Como keynote speaker, AAA a invita e COO di Princess Juliana International Airport (SXM) Sr. Michael Hyman cu a duna un presentacion ariba e topico “Surviving a Hurricane” cu un bista ariba e operacion di SXM durante y despues di horcan Irma y Maria na aña 2017.
Como parti di e di dos dia di Safety and Security Week, a enfoca ariba e topico “Active Shooter” cual a wordo presenta door di Sr. Miguel Figueroa di JetBlue Corporate Security. Sr. Figueroa a elabora ariba e incidente di “active shooter” cu a tuma lugar aña pasa na Fort Lauderdale y locual nan a sinja for di esaki. Adicionalmente, Sr. Jonathan Hoepel y Sr. Jorge Lacle di AAA su Safety and Security Unit, a duna un presentacion tocante e diferente preocupacionnan relaciona cu drones, e diferente consecuencianan di e uso di drones y tambe e esfuersonan cu Aruba ta haciendo pa rebaha e risiconan cu ta bini cu e uso di drones pa cu e seguridad di trafico aereo.
E siman a continua cu un presentacion duna pa Sr. Michiel van Ewijk di BPO kende a comparti diferente punto valioso pa cu prevencion di candela na un aeropuerto y un presentacion di Sr. Julio Aponte di American Airlines cu a papia tocante “Human Factors” den seguridad di aviacion y e importancia di por reconoce e factornan aki durante operacion diario. Atardi, Cuerpo Policial a duna e usuarionan di aeropuerto un training di self-defense cu enfoca ariba e tacticanan basico pa por trata cu usuarionan di aeropuerto cu ta desobedece e reglanan of ta agresivo.
Ariba e di cuater dia, Ibisa su Bus di Salud a brinda tur usuario di aeropuerto e oportunidad pa asina hasi un chequeo gratis di cual e usuarionan a hasi bon uso di dje. E dia a continua cu un presentacion di Sr. Thomas Nuijten cu a papia tocante e proyecto Gateway 2030 y con e trabounan ta canando pa e expansion, Sra. Jeanette Richardson-Baars di Cuerpo Policial cu a enfoca ariba e topico “Human Smuggling and Trafficking” y a duna e usuarionan diferente tips con pa reconoce un “human trafficker” of un victima y kiko por haci den un caso asina, y finalmente Srta. Stephany Kock y Srta. Jelitza Krozendijk di AAA a elabora ariba e rol y responsabilidadnan di AAA su Apron Management Unit. Pa conclui e dia aki, Sr. Lars y Sra. Sheryl Stolk a duna dos Strength Circuit Training sessions pa e usuarionan por a haci ehercicio.
AAA a finaliza e siman di Safety and Security cu un “Safety Talk” tocante “Foreign Object Debris (FOD)” y un “FOD walk” riba Taxiway Golf. AAA ta sumamente contento cu e asistencia di su usuarionan na e diferente presentacionnan y alavez kier a gradici tur cu a contribui di un manera of otro pa prepara y ehecuta un siman informativo y interactivo.
