Entrante diaranson, 31 di maart 2021, tur adulto mayor di 60 aña cu a registra pa por vacuna y no a haya un cita ainda y tambe tur esunnan cu no a logra registra ainda pa un motibo of otro, por presenta libremente na un di e tres localidadnan di vacunacion pa ricibi nan vacuna.
E adulto mayor di 60 aña bay ariba por pasa libremente sea na Club Don Bosco na Noord, Centro Libertador Betico Croes na Santa Cruz of Santa Teresita Center na San Nicolas di dialuna pa diasabra entre 8:30 cu 11:00 di mainta of 2:30 cu 5:00 di atardi pa ricibi nan vacuna sin necesidad di un cita. Tur loke mester bin cu ne na e localidad di vacunacion ta su carchi di AZV.
Ta importante pa informa si cu en conexion cu Semana Santa e siman aki tur localidad di vacunacion lo ta cera riba dianan 2, 3, 4 y 5 di april. Riba dialuna 5 di april e unico localidad cu lo ta habri mita dia pa vacuna unicamente esunnan cu ya tin un cita programa ta Centro Libertador Betico Croes. Entrante diamars dia 6 di april tur localidad di vacunacion lo ta den funcion normal atrobe. Entrante diamars 6 di april MFA Noord, MFA Santa Cruz, MFA Paradera y Santa Teresita Center tambe lo sigui brinda asistencia na comunidad pa por sigui registra pa vacunacion y tambe por sigui registra via Aruba Health App.
Grupo di meta entre 18 cu 60 aña sin condicion di salud tambe ta cuminsa haya nan cita den e dianan venidero pa cual motibo ta urgi tur persona cu ta interesa pa vacuna y no a haci esaki ainda pa haci esaki awor si pa por haya un cita.
