E trayecto a cuminsa tres aña pasa na momento cu un dokter hoben di Aruba a duna di conoce cu e ta desea pa sigui su specialisacion como dokter di KNO y despues regresa Aruba. A dicidi pa mira unda por traha hunto pa asina dokternan Rubiano por specialisa nan mes y bay bek Aruba y asina yuda den e falta di capacidad di specialistanan na Aruba. Prof. dr. Peter Paul van Benthem, hefe di KNO na LUMC, a bisa cu nan a haya hopi sosten di e Hunta di Conseho di Administracion den esaki.
Awe na hospital academico di Leiden, esta e Leiden University Medical Center (LUMC), a tuma luga firmamento di un Memorandum of Understanding entre LUMC, Pais Aruba y dr. Horacio Oduber Hospital. Pa LUMC a firma presidente di Hunta di Conseho di Administracion prof. dr. Douwe Biesma, pa dr. Horacio Oduber Hospital (HOH) a firma Jacco Vroegop, director general di HOH y Minister Plenipotenciario di Aruba mr. Ady Thijsen a firma den nomber di Minister di Salubridad y Turismo, Dangui Oduber. Tambe presente tabata Chaira Straathof, neurologo na LUMC, Jan Verschuuren, hefe di neurologia na LUMC, Judelka Briceño, consehero di Minister Oduber, mr. Shandra John, hurista di Gabinete di Aruba y Nuris Dabian, coordinador Bienestar General y Cultura na Gabinete di Aruba.
Consehero di Minister Oduber, Arlene Ellis-Schippers a duna un splicacion cortico di e situacion den cuido na Aruba. Aruba ta trahando riba un manpower plan pa asina determina como pais kico bo mester. Den e cooperacion cu LUMC ta hinca un proyecto di estudio riba tereno di specialisacion pa KNO, neurocirugia y ciruhano di cacumbein.
Director di Horacio Oduber Hospital, Jacco Vroegop a duna un splicacion riba e situacion actual di e hospital, e retonan y tipo di cuido cu HOH ta brinda hunto cu IMSAN. Vroegop tambe a accentua e necesidad di cooperacion y cu e MOU aki ta e prome paso pa yega na logronan grandi pa HOH y Aruba.
Minister Plenipotenciario Ady Thijsen a bisa di ta contento cu awe Aruba ta firma un MOU asina importante cu LUMC. Esaki ta mustra e necesidad di cooperacion entre enseñansa y cuido. ‘Aruba ta pasando den un fase unda e proceso di vergrijzing ta pone cu aki un par di aña, Aruba mester di hopi trahado. Nos ta prefera pa sondea manera pa nos mesun hendenan regresa Aruba. E MOU aki ta un señal positivo y duna inicio na formanan di cooperacion cu ta cuadra cu e vision y maneho di Gabinete di Minister Plenipotenciario,’ tabata palabranan di Minister Thijsen.
E MOU entre LUMC y Aruba tin como meta pa registra e intencionnan unda tur partido envolvi, ta coopera pa realisa un expansion di e posibilidadnan di estudio pa specialisacion medico, como tambe conocemento y intercambio di personal entre professionals di HOH y LUMC. Cu e MOU aki ta purba, segun e compromisonan haci, pa crea posibilidad pa Arubianonan cu ta cumpli cu e criterianan di seleccion di LUMC por haya un luga di estudio pa specialisacion banda di e cantidad cu LUMC ya tin caba.
