E aña aki ta di seis aña cu Comision Vision Pedagogico ta organisa e Siman di Lantamento di Mucha combina cu e Celebracion di Dia Internacional di Derecho di Mucha. E comision ta consisti di diferente instancia trahando ariba tereno di lantamento di mucha manera: Tienda di Educacion, Fundacion Respetami, Fundacion pa Nos Muchanan, Wit Gele Kruis y Departamento Asunto Social conhuntamente cu Ministerio di Husticia y Asunto Social y Comision Derechonan di Mucha. Durante e siman aki tin diferente actividadnan di diferente organisacion cu por wak mira e kalender.
Lo duna atencion special na articulo 31 di Derechonan di Mucha e aña aki. E articulo ta pone enfasis riba e derecho di un mucha pa tin tempo liber y di por tin tempo pa hunga ariba un forma recreativo. Pa medio di nos actividad nos kier stimula e hungamento sano y pafo pa tur e muchanan.
Nos kier haci un invitacion na henter comunidad, vooral nos muchanan pa diasabra 18 di november, bin celebra e dia importante aki na Carnival Village, San Nicolas. E orario lo ta di 3:00pm te cu 7:00pm.
Rib’e dia aki lo tin diferente actividad, manera
• Dino jump, Carousel, Roulette,
• Rollerskating, Hotwheels, diferente wega, Facepainting
• Free popcorn, raspao y cotton candy pa tur muchanan cu jega tempran
• Lo tin show di grupo di baile Dazzling group, un grupo di karate y tambe show di cacho Fluffy Paws.
E actividad aki lo ta combina cu e marcha di nos muchanan, “Marcha pa nos derecho” cu lo sali 3or di atardi for di YMCA San Nicolas y lo cana den e cayanan di San Nicolas y termina na Carnaval Village.
Diferente instancia di e Comision Vision Pedagogico lo t’ey pa combersa y ofrece sosten na e mayornan cu cualkier pregunta ariba tereno di lantamento di mucha. E kiosconan di Carnaval Village lo tin nan dushi cuminda na benta pa tur e mayornan.
E comision kier gradici Cede Aruba, Departamento Asunto Social y Gobierno di Aruba pa sostene e celebracion aki. Nos ta invita e comunidad en general specialmente nos muchanan pa bin celebra e Dia di Mucha aki!
Pa mas informacion pa participa por yama Centro pa Hoben y Famia na 5281200.
