Diabierna tabatin e apertura di IPKO caminda cu e parlamentarionan di e tres islanan autonomo den Reino y esunnan di Hulanda, a reuni. Miguel Mansur, lider di fraccion di Accion21 den Parlamento tambe tabata presente y na su salida el a splica mas e pakico di su intervencion na momento cu Hendrik Tevreden di MEP tabata na palabra.
Segun Mansur, den IPKO no ta caminda pa bin yora pasobra cu Hulanda a bin c’un Rijkswet riba Gabinete Wever-Croes. For di 2018 Aruba no ta entregando un jaarrekening . Mansur a indica tambe cu e echo cu Aruba tin un surplus ta danki na Profesor dr. Raymond Gradus, cu a recomenda un aanwijzing, un KB riba Gabinete Wever-Croes. E falta di un Rijkswet for di 2010, a costa Aruba 5.2 biyon florin.
Ademas, Mansur a sigui bisa, IPKO no ta e luga pa protesta tocante e Rijkswet. Si e no ta satisfecho of contento cu su Prome minister a firma e Rijkswet, e ora e baha e gobierno.
E ta spera cu por hiba discusionnan na nivel y no e mesun politikeria cu ta costando nos pais biyones di florin. Te asina leu e declaracionnan di Miguel Mansur, lider di fraccion di Accion21.
