Accion 21 tambe a duna su punto di bista despues cu Prome MInister Evelyn Wever-Croes a entrega retiro di su gabinete na Gobernador.
Miguel Mansur, lider di partido Accion 21, a comenta cu integridad ta mas cu palabra. E ta un accion y e ta contento di mira cu despues di mas di tres aña di gobernacion, a tuma un paso pa integridad, mirando e acusacionnan fuerte contra lider di POR.
Tabata e momento y accion apropia pa yama eleccion trempan.
Integridad ta algo cu hopi partido ta papia riba dje. Segun Mansur si mira e ultimo 20 añanan, nos ta bibando den un estado partidista y no un estado constitucional caminda cu corupcion ta orden di dia.
Loke cu Accion 21 kier bin cu ne ta un reforma. Tin cu reconoce cu ta bibando den un sociedad desfuncional. A haci un encuesta cientifico, caminda cu e problematica mas grandi pa pueblo ta corupcion, specialmente Friends & Family.
Si ta wak e dos partidonan tradicional, nan a renoba den e ultimo 20 añanan, a bin cu lista nobo, pero en realidad esey no a cambia. Ta importante pa reconoce cu tur ta coresponsabel pa e destino di nos pais.
Aworaki ta momento pa kibra cu politica tradicional, friends & family y corupcion. Awo ta momento pa nabega un rumbo nobo.
UN DI TRES ALTERNATIVA
Accion 21 ta e unico partido liberal y progresivo, segun Mansur. Un di e retonan mas grandi cu e proximo gobierno lo bay tin ta revitalisacion di economia y despues finansa. Si ta biniendo di e modelo social-democrata cu ta basa riba socialismo, cu ta gobierno mester cuida bo for di momento cu bo nace te na momento di fayecimento, e ora e ta un tiki mas complica.
Realmente kier empodera tur hende pa yega na nan potencial maximo, mirando ki acogida tin.
Pa bin cu un di tres alternativa, Accion 21 ta e unico alternativa cu ta brinda algo diferente. Dos partido grandi entre nan tin 4 pa 5 asiento sigur cada un, cu ta nan base. Segun Mansur tin 11 asiento cu realmente ta liber gana pa un plan di partido, gana pa un campaña digno. Realmente e persona y e partidonan cu ta bay inspira pueblo pa trece un gobierno confiabel bek, algo cu tin varios decada sin dje.
PLAN DI PARTIDO
Mansur a indica cu nan tin un plan di partido, pero e no ta publica ainda. E reforma gubernamental ta cla, economia y finansa ta cla, enseñansa ta kedando cla, programa social ta kedando cla. Obviamente no a spera e caida di gobierno. Tabatin un strategia pa si mester bay eleccion trempan den tres luna esey ta loke ta ehecutando aworaki. E puntonan final cu falta di e plan di partido, aworaki ta delantando nan.
Mansur ta agrega cu mester acelera tur cos. Tambe tin cu tene cuenta cu e pandemia. Sa cu lo tin limite di aglomeracion. E lo ta un campaña hopi digital. Lo sigui cu e lema cu no lo bay uza bandera ni sticker. No ta consciente pa medio ambiente pa haci esaki. Tambe mirando e necesidad den pueblo, no ta momento pa gasta hopi placa den campaña.
