Na Miami, Merca, ta biba un Rubiano cu a scoge pa haci su bida eynan, unda e ta traha y na banda ta haci su deporte preferi cu ta beach tennis. Ta trata di Chauncey Koolman. Den un anochi direccion pa cas, el a hay’e envolvi den un accidente y consecuentemente awe e ta parcialmente invalido.
Chauncey Koolman, deportista, a expresa prome cu su accidente e tabata un persona hopi ambicioso. Semper e tabata busca un manera pa sali dilanti y e deporte di beach tennis semper tabata su pasion. El a bay Merca pa bira un coach of organisado, purba sali dilanti cu beach tennis.
Pero, Miami ta mas grandi, y si un persona kier biba su so, e mester busca un manera pa haci esey. Koolman a bira bendedo pa All State y a purba biba su bida mas independiente.
Hopi hende conoce Chauncey den e mundo di beach tennis. Y na Miami tambe e tabata practica e deporte. El a keda cu e ‘vibe’ di Aruba door di sali bay beach, bebe, sali cu amistad y disfruta di e deporte.
Pero den luna di october el a hay’e envolvi den un accidente fuerte na momento cu e tabata stuur riba e careteranan di Miami. Chauncey a splica cu un diadomingo el a sali c’un amiga. El a baha e amiga cas y a bay rumbo pa su mesun vivienda. E auto cu e tabatin, segun Chauncey, tabata un tiki mas sofistica. Como cu e no tabatin hopi gana pa stuur e auto, el a scoge pa pon’e riba lane control y cruise control. Durante e ruta awa tabata yobe hopi duro. Como cu e auto ta algo traha pa hende, e vehiculo no a cay na cuenta cu awa tabata cay. Un cos a cay y el a opta pa bay lant’e. Na momento cu el a hisa su cabes, Chauncey a realisa cu e tabata banda di e rails caba.
E no tabatin forma pa evita e accidente. El a dal contra e rails, cual vehiculo a spin y na momento cu e airbag a sali, e ta kere cu esey a dal e na su wervelkolom (weso di lomba) y e mes a termina bou di e stuurwiel.
Chauncey tabata na tino tur tempo. E ta corda cu dos persona, dos angel, un homber y un hende muhe, a para y sac’e fo’i auto. Nan a keda papia cu ne te ora ambulance a yega pa hib’e hospital.
Tratamento
E mester tabata opera. Aki dokter a bis’e cu tur cos a bay bon cu cirugia. Pero, na momento cu e mes a lanta, el a ripara cu e no por a sinti movecion di su pia, bou di su pecho. E unico movecion cu e tabatin, tabata hisa su man.
Diamars e tabatin afspraak cu e dokter cu a oper’e. E dokter ta mir’e positivo y esey ta algo grandi den tipo di cos asina aki.
Bida a cambia
Awo cu e ta den un rolstoel, tur cos a cambia p’e. E ta algo sentimental pa Chauncey, kende a expresa cu den e sapato aki, e no por biba su so. Su amigo, esta Carlos Marquez, cu ta un coach di beach tennis na Miami, ta manera su angel guardian. E ta yuda Chauncey ora mester. E ta bay su terapianan pa asina un dia e por ta bek riba su pianan, pa tin su bida independiente.
Pa mas lesa TREMPAN.COM.
