Dialuna atardi algo pasa di 6’or, presencia di polis a wordo pidi cu urgencia banda di e dam banda di e dam entre Piedra Plat cu Siribana, direccion Cashero. Eynan a sosode un accidente cu hende herida. Na momento cu e prome unidad di Santa Cruz a yega na e sitio, nan a topa cu un pareha herida den un accidente contra un jeep.
Nan tabata biniendo for di p’ariba cu e brommer, ambos sin helm. Na altura di e dam, algo a bay robes. Nan a bay den parti robes di e caminda y dal frontal riba un Jeep Wrangler color blanco cu tabata bin di direccion contrario. E impacto a causa cu e dama a keda benta riba hood di e auto, el a dal den e windshield tambe, mientras cu e manehado a keda benta abao dilanti di e jeep cu fracturanan serio na su pia y tambe herida na cabes. Dos unidad di ambulance a yega cu urgencia na e sitio y asina a cuminsa atende cu ambos pashent y transporta nan pa hospital.
