Dialuna anochi alrededor di 10:30 pm polis a presenta riba e caminda smal na Bloemond cu ta bay pa e bario di Sero Lopez. Na e sitio a encontra dos auto y cada chauffeur cu nan propio declaracion di con e accidente a tuma luga.
Na un banda, e chauffeur di e auto berde a declara cu e tabata core riba un speed normal bayendo direccion Sero Lopez y cu e auto tabata mucho riba su banda y p’esey a dal den dje.
E chauffeur di e Toyota shinishi, cu tabata bin di Sero Lopez, mientrastanto a laga sa cu e auto berde tabata core duro y ora cu a topa cu ne, nan a dal den otro. Esunnan di seguro hunto cu polis di trafico a cuminsa haci nan trabou di investigacion y midi, entre otro, e hanchura di e caminda. Resultado di e investigacion lo bay determina ken tin e culpa den e accidente.
E accidente no a causa ningun herido, pues asistencia di ambulance no tabata necesario.
