Abogado mr. Chris Lejuez ta representa minister plenipotenciario Guillfred Besaril, kende a bin cu un kortgeding contra di ex parlamentario di AVP, Melvin Tromp. Esaki tin di haber cu cierto cosnan cu a wordo papia. Entre otro a yam’e pa Prins Pedofiel. Esey ta un di e motibonan cu awe, e persona aki a dicidi di bay corte.

https://www.facebook.com/24ora.aruba/videos/10160444768420001/

Abogado Lejuez a splica cu no tabata tin caso cu a wordo trata. Esey no tabata e intencion at all. Lejuez a prepara e caso debidamente, cu tur loke el a haya, particularmente, abogado di defensa locual e ta kere cu ta forma prueba den e caso aki. No tabata tin ningun tipo di prueba, fuera di un declaracion di un persona cu ta bisa entre otro cu el a tende di un otro persona y e otro persona a tend’e for di un otro persona cu a bis’e na telefon. Y e persona ey a tende directamente for di esnan envolvi of no, tampoco no ta conoci.

E ta un storia cu ta bin di nan di cu e di, cu fulan di, cu tal di. Esey ta e base di e caso aki. Ora cu segun e abogado, nan a ripara cu nan no tin caso, na ultimo ora awe mainta, net prome cu e caso, nan a laga e abogado sa y despues a bisa hues, cu nan ta retira y ta dicidi cu no ta hiba ningun tipo di defensa. Si bo no hiba defensa, b’a perde bo caso. Motibo cu a perd’e ta, pasobra cu bo no a hiba defensa. Si bo no a hiba defensa, ta pasobra bo no tin defensa pa hiba, segun Lejuez, cual ta nifica cu demandante, cual ta sr. Besaril, a haya loke e ta desea y esey ta un rectificacion.

E rectificacion mester aparece na dos diferente caminda, unda a yam’e pa Prins Pedofiel, cual ta riba 24ora.com y den Awe Mainta.

E rectificacion cu hues a dicta caba, pasobra ainda a wordo purba di parti di e demandando, esta sr. Tromp su abogado, pa purba di cambia e palabranan di e rectificacion, cual hues a nenga, cual ta e rectificacion cu e tin cu pone riba 24ora.com y Awe Mainta.

E rectificacion

“Riba ordo di hues, segun su veredicto riba 28 di Februari, 2018, Ami Melvin Atanacio Tromp, ta declara lo siguiente. Riba dia 1 y 2 di Februari, 2018, a ser publica riba e Website 24ora.com y e corant digital Awe Mainta, un articulo bao di e titulo Prins Pedofiel kier un palacio nobo.

E articulo aki ta contene expresionnan cu mi a haci publicamente, unda mi ta referi diferente biaha na e actual minister plenipotenciario di Aruba na Hulanda, como prins Pedofiel. Di e forma aki acusando su persona mas cu un biaha di ta pedofiel.

Pa medio di e comunicado aki, ami, ta declara, cu mi no tin prueba cu ta berdad di e acusacion serio aki, cual ta innecesariamente doloroso y ilegal contra e actual minister plenipotenciario di Aruba na Hulanda. Pesey, pa medio di e comunicado aki, ami ta rectifica y revoca e acusacion aki.”

Tin basta tempo andando

Abogado Lejuez a splica cu un punto cu nan a trece padilanti cu nunca antes sr. Besaril no a actua, cual no ta berdad. A entrega na corte prueba di dos biaha cu sr. Besaril a entrega un keho, un strafrechterlijke aangifte, na polis. Dos proces verbaal a wordo entrega na hues. Un ta di 2014, uno ta di 2015. Besaril a haya un carta di Ministerio Publico, pa bise, como cu e ofensa a tuma luga e tempo ey den Staten, e tin imunidad parlamentario y ministerio publico no ta bay persigui’e. Pero awor aki no ta trata di e punto ey mas. Awor aki Tromp ta pafo di Parlamento y Besaril awor aki ta basta y tin cu rectifica y esey ta loke ta bay pasa.

Reaccion oficial

Pa mas tarda pa mañan hues lo manda e vonnis y Tromp lo tin cu bay rectifica.

E rectificacion lo bay mas pronto posibel, cual lo tin cu bay sali den Awe Mainta y 24ora.com, unda cu e articulo aki a wordo manda. No sa si a mand’e mas caminda. Pero den e dos medionan aki, ta caminda cu a wordo publica. Awor aki e rectificacion aki lo bay wordo publica sigur.