Abogado di prensa Jens van den Brink den un declaracion cataloga e gijzelmento di e periodista Hulandes Robert Bas como un “herment excepcional”.
“E spirito di ley no tabatin esaki como intencion. No ta sin mas bo por uza un periodista como un herment den investigacion, si esey sosode e lo ta e fin di periodismo.” A gijzel Bas pasobra e no ta dispuesto pa contesta pregunta como testigo den e caso penal andando di asesinato robes riba director di GGZ Rob Zweekhorst na 2014.
E ta bay specificamente pa e pregunta cu Bas a haci na un fuente, cu a wordo getap pero kende no tabata un sospechoso den e caso. Hues kier sa pakico e periodista a haci e pregunta ey. Bas no kier contesta y ta apela riba e “verschoningsrecht” di periodista: e kier protege su fuente. Pero segun Hues Comisario e declaracion di Bas ta pisa mas cu e proteccion di fuente pasobra e asesinato ta un delito serio y un sospecho pisa. Efecto contrario Segun van den Brink e argumento aki no ta valido. “Por uza e tipo di hermentnan solamente ora cu un periodista por evita un delito serio. E ora por pensa riba atentado of asesinato. Mi no ta mira ningun caminda un decision di Hues Comisario pakico nan ta pensa cu Bas tin informacion crucial cu lo por cambia henter e proceso of cu esaki ta di gran importancia pa sociedad.”
HC a bisa tambe cu e nomber di e fuente di Bas ta menciona varios biaha cana den audiencianan publico, y pa cual e “verschoningsrecht” no ta valido mas. Esaki “absolutamente no ta cuadra”, segun Van den Brink. “Proteccion di fuente no ta limita na identidad di e fuente. Verschoningsrecht ta conta tambe si e fuente ta conoci, segun por deduci di diferente sentencianan, y tambe di Corte Europeo.” Aña pasa e ley di Proteccion di Fuente a drenta na vigor. E intencion tras di esaki tabata bon, pero ta parce ta traha net lo contrario, Van den Brink a bisa. “Huesnan ta interpreta e leynan den forma mucho limita.”
‘Hues no a haci su huiswerk” Van den Brink ta pensa cu Hues Comisario ta dirigi su mes mucho riba busca e berdad den e caso, y ta tene poco cuenta cu interes periodistico. “Nan ta pensa: “periodista no haci dificil. Nos kier soluciona un asesinato” Pero esey hustamente ta e fout. Nan no ta profundisa riba e derechonan di e periodista.” “E hues probablemente a wak di forma limita na e ley y no a haci su huiswerk. Si el a haci esey, e lo a yega na e conclusion cu no sin mas nan por gijzel e periodista.”
