E caso contra e acusado Billy Piternella trata den Corte diabierna ultimo, a hala hopi atencion. Esaki pa e relacion onortodoxo cu e acusado tabatin cu su casa di un banda y su byside di otro banda. Tur tres den e relacion aki tabata na altura di otro. Pero, despues di dos aña a separa for di e amante, kende a bisa cu finalmente el a haya e curashi pa keha e homber di: violencia sexual, tortura, menasa y maltrato pisa cu diferente tipo di arma. Fiscal di Ministerio Publico den e caso aki a pidi un castigo di 6 aña di prison incondicional. Dia 29 di juli Corte lo dicta sentencia.
E abogado cu a asisti e acusado den e caso, mr. Peter Mohammed, a bisa hues cu e keho/declaracion duna na un inicio door di e denunciante na polis, a pinta su cliente manera un monster. Uno cu su unico meta tabata pa maltrata e señora aki mas cu e tabata por, menasa y humiy’e den e formanan mas cruel posibel.
Tur esaki a sali afo di e declaracion duna dia 7 di januari, 8 di januari y riba dia 14 di februari (valentine’s day). Cu hopi detaye, e victima a declara di loke e mester a pasa aden durante su relacion cu e acusado. “E bista cu bo ta haya tabata cu Piternella tabata domina por completo e bida di K., unda e tabata wordo poni bou presion pa soporta tur sorto di acto riba tereno sexual.”
E acusado tambe a duna un declaracion hopi amplio di su relacion cu su ex-pareha K. Mester menciona cu e acusado tabata sincero pa admiti cu el a haci cosnan robes. Pero tambe el a bisa cu el a keda sorprendi pa e acusacionnan di e señora K. Pasobra di actonan sexual obliga no tin nada di berdad, el a bisa y e denunciante sa esey masha bon. E por zona straño pa mundo, pero Piternella tabata un homber casa y su casa tabata totalmente na altura di su relacion cu K. y e no tabatin problema cu esey tampoco.
