Awe merdia ainda a yega un Air Ambulance di e compania SARPA for di Colombia pa busca Sheyenne Yarzagaray di 25 aña di edad. E tabata den un situacion critico den e unidad di cuido intensivo (ICU) di hospital y e specialistanan a conseha AZV pa manda e pashent Colombia urgente pa ricibi tratamento avansa.
E accidente mes
Tabata diahuebs ultimo algo prome cu 9:00 pm cu a sosode un accidente di trafico riba Avenida Milio Croes na altura di e crusada dilanti di edificio di Voogdijraad. A topa cu e motociclista benta cant’i caminda herida bou di e mata di kwihi na skina di Express Events.
E brommer envolvi
E victima ta e motociclista Anthony Croes, cu recien tabata envolvi den un otro accidente di brommer. Na e ocasion ey el a resulta gravemente herida y a hasta perde un organo den su curpa. E biaha aki su situacion no tabata di tanto gravedad y entretanto por a sali for di hospital caba. E impacto tabata fuerte y mayoria di e sla a concentra patras, unda e pasahero femenino tabata sinta. Nan dos tabata riba e brommer marca Suzuki modelo GSXR-750.
E auto envolvi
E auto envolvi den e desgracia tabata di marca Mitsubishi, modelo Lancer, color blanco, cu plachi di number A-15184. E tabata cla pa bay crusa na su man robes pa bay direccion di Sabana Blanco y e brommer tabata bayendo noord bahando for di Flora Market direccion Dakota. E auto a lora dilanti e brommer, cu consecuencia conoci.
E victima
Testigonan a conta cu e pasahero riba e brommer, Sheyenne Yarzagaray, di 25 aña di edad, a bula den laira door di e impacto y a bay cay varios meter leu di e chauffeur, riba asfalt. E tabata sangra hopi for di su boca. Na hospital a intern’e den cuido intensivo despues di a constata cu e sla ricibi den e accidente a afecta varios organo den su curpa. Varios specialista na Aruba a traha riba e victima pero na dado momento a conseha pa AZV mand’e Colombia pa ey nan brind’e un cuido specialisa na e heridanan cu el a ricibi.
A sali cu Air Ambulance awe
Awe a yega un avion Air Ambulance di e compania SARPA di Colombia. SARPA ta existi desde aña 1980 como un compania di charter. Nan ta e unico compania pa ofrece vuelonan charter te cu 30 pasahero. Desde aña 2003 ta ofrece servicio di Air Ambulance y a yega na un acuerdo formal cu AZV pa transporta pashentnan pa Colombia.
