Asegurando un experiencia digital innovativo y facilita
Den aña 2022, Oficina di Turismo (A.T.A.) a uní na e proyecto innovador di Aruba One Happy Pass, den colaboracion cercano cu Ministerio di Turismo, Indicio, SITA, Departamento di Imigracion di Aruba, Aeropuerto di Aruba, y Departamento di Aviacion Civil.
Un proyecto caminda cu A.T.A. ta contribui y participa activamente pa mehora e experiencia di bishitantenan na yegada na aeropuerto di Aruba. E implementacion di tecnologia biometrico facial ta facilita un yegada mas agradabel y eficiente pa e bishitante.
Den su etapa piloto y cu pronto lo wordo lansa, Aruba ta bira e prome isla den Caribe pa ofrece un sistema innovativo y facilita, cu e meta pa mantene Aruba su posicion di liderazgo den e industria di turismo. Durante di e pandemia, Aruba a demostra di ta sigui innova como destinacio den Caribe cu introduccion di, entre otro, Aruba Health App, y colaboracion di JetBlue cu introduccion di Common Pass.
E vision tras di Aruba One Happy Pass ta pa facilita yegada di bishitantenan, alabes pa enfoca riba continuacion, desaroyo, y innovacion di e plataforma.
“Nos kier yega na e punto caminda cu proveedor di otro servicionan, manera car rentals, hotels, of otro, lo wordo alerta di biaha riba yegada di e bishitante, pa asina por agilisa e proceso di yegada mas aun pa e bishitante. E idea ta pa e bishitante tin un experiencia asina integra, cu nan lo por ta na beach dentro di 30 minuut.” tabata palabranan di Chief Executive Officer di Aruba Tourism Authority, Ronella Croes
