Aruba Convention Bureau (ACB), bou di encargo di Aruba Tourism Authority (A.T.A.) orguyosamente ta logra premiacion di ‘Best CVB/DMO International’, esta ‘Best Convention & Visitors Bureau y Destination Management Organization’ na Smart Stars Awards 2024, organiza pa Smart Meetings Magazine. E reconocemento prestigioso aki ta subraya e compromiso constante di Aruba Convention Bureau (ACB) pa promove Aruba como un destinacion atractivo pa reunion, biahe incentivo, conferencia, y exhibicion (MICE).
Smart Meetings, un publicador lider di e industria di reunion, y e bos di inspiracion p’e profesionalnan den e industria, anualmente ta invita socionan den e industria pa nomina y cumpli cu voto riba experiencia propio cu un Convention Bureau. Ta un honor di por anuncia oficialmente cu ACB ta selecciona como e ganado absoluto di ‘Smart Stars Awards 2024’. Un resultado cu sigur a trece cu ne un gran orguyo pa e ekipo di ACB.
E reconocemento aki ta un testimonio di e dedicacion, pasion, y trabou duro estableci pa e team di ACB. E ta trece un gran satisfaccion pa mira cu e esfuerso pa promove Aruba, y e compromiso pa sigui mehora continuamente, ta reconoci internacionalmente. Un logro cu ta refleha e espirito di e ekipo di ACB pa continua na expande e conocemento, comparti, y celebra tur logro.
Banda di e premiacion aki, Aruba ta logra conkista dos otro premio prestigioso di Smart Meetings:
· Aruba Marriott Resort & Stellaris Casino a wordo nombra como e “Best Beach Hotel.”
· Hilton Aruba Caribbean Resort & Casino a wordo premia como “Best Incentive Hotel.”
A.T.A. ta sumamente orguyoso di su ekipo di ACB, y ta felicita Aruba Marriott Resort & Stellaris Casino y Hilton Aruba Caribbean Resort & Casino cu e premiacion. E logronan aki ta continua na posiciona Aruba como un destinacion atractivo pa biahe personal, como pa negoshi.
Tocante Aruba Convention Bureau
Aruba Convention Bureau (ACB) como parti di A.T.A. ta dedica na promove Aruba como un destinacion atractivo pa organisa reunion, biahe incentivo, conferencia, y exibicion (MICE) na companianan internacional. Pa medio di socionan strategico y servicio di calidad mundial, ACB tin como meta pa atrae y sostene eventonan cu ta contribui na crecemento y desaroyo economico pa Aruba.
Tocante Aruba Tourism Authority (A.T.A.)
Desde prome di januari 2011, Aruba Tourism Authority ta opera como un entidad ‘Sui Generis’. Un organizacion independiente den e esfera publico. Aruba Tourism Authority ta fungi como ‘Destination Marketing and Management Organization (DMMO)’ y ta responsabel pa uni interes turistico entre socionan local e internacional. A.T.A. ta pone hopi enfasis riba e modelo di “High Value-Low Impact” cu ta para pa un balansa entre aumenta e balor economico di e bishitante, posiciona Aruba como un pais desea y sostenibel, y posiciona Aruba como lider di desaroyo como un destinacion. Cu meta pa sigui mantene e esfuersonan den linea segun e balansa menciona, y logra aumenta entrada pa medio di calidad di turismo en bes di e volumen cu nos destinacion ta ricibi. Capacidad di carga ta sigui ricibi atencion di parti di A.T.A.
