Recientemente a tuma luga e eleccion di Sindicato di Polis (SPA). E candidatonan tabata practicamente e mesunnan di e directiva prome. Pa cada puesto, a postula solamente un persona, pues un eleccion poco diferente. Por ehempel, pa presidente di sindicato, ta solamente Rodney Solognier a postula. E sindicato a conta tambe cu algun comisario nobo, cual ta algo cu SPA tabatin mester di dje, Rodney Solognier a conta durante un entrevista na su cas.
Na su cas p’e echo cu ainda e ta malo despues di e accidente cu el a pasa den dje algun tempo pasa. El a recupera basta, pero ainda ta delicado. E amor pa su trabou y sindicato semper t’ey.
E ‘dagelijkse bestuur’ nobo ta consisti di Rodney Solognier mes como presidente, Francel Bernardus, miho conoci como “Chebele” como vice-presidente, Christian Soto como secretario y Michelle Rasmijn como tesorero. Como comisario, Raymond Lacle, Kock, Palm y Alex Wernet.
Segun Solognier, e ta sinti cu e miembronan tin confiansa den nan p’esey a reeligi nan atrobe. E eleccion a conta cu mas di shen voto, kende a vota na e wardanan di polis. Entre e plannan cu tin pa futuro, un di nan sigur ta e parti di uniform. Tin hopi polis cu ainda no a ricibi carson y ta algo cu nan lo bringa p’e, ainda pa e aña aki. E parti di portofoon di polis, tambe ta algo cu nan mester di dje urgente, esunnan cu nan tin actualmente no ta optimal mas. E parti di pensioen di polis tambe ta un punto cu nan kier traha riba dje, nan kier pa e polisnan baha mas trempan y no te cu 65 aña.
