Miembronan di Kamer di PVV ta custuma pa hopi aña pa comunica cu e publico via Twitter (awendia X) Esaki a trece problemanan awor debi cu algun miembro di Kamer a pasa nan over pa e gabinete nobo Hulandes.
Asina mester a pospone diahuebs merdia (ora di Hulanda) e debate den Tweede Kamer tocante e “regeringsverklaring”, despues cu parlamentario Rob Jetten (D66) a pidi pa un clarificacion tocante un “post” publica riba e plataforma “X” di vicepremier Hulandes Fleur Agema.
Cu e tweet aki Agema a mina un argumento anterior di e premier Hulandes nobo Dick Schoof. Mientras cu e minister presidente ta declara cu p’e “no ta importa si un hende ta bisti un “paña na cabes”, aki Agema a sugeri atrobe cu un biaha mas cu e si tin molester di esaki. Un diferencia di opinion comparti publicamente di e forma aki, ta empugna cu e union di maneho di e gabinete.
E vicepremier a prepara su mensahe den un forma odioso den direccion di Femke Halsema. E alcalde di Amsterdam a comparti via su cuenta riba e plataforma social di Instagram, e video di miembro di Kamer di partido GroenLinks PvdA den persona di Esmah Lahalah cu a uza e derecho pa defende e hende muhenan cu nan por tin e libertad di bisti “manera nan kier”. Esaki aparentemente Agema a haya tawata haci di forma hipocrita.
Mientrastanto e persona cu ta e centro den henter e discusion aki ta e miembro di GroenLinks PvdA cu ta Esmah Lahalah debi cu e ta bisti un “paña riba su cabes”. Na un cierto punto e discusion a bay for di man durante e reunion den Tweede Kamer, cu a bay den extremo cu e parlamentario femenino a sali na yoramento for di e sala, debi cu su persona a sinti su mes ofendi pa varios palabra expresa durante e reunion encuanto su “paña riba su cabes” cu e ta uza.
Durante debate cu mester tawata originalmente pa trata e “regeringsverklaring” di e gabinete nobo, a bay totalmente den un otro rumbo tocante e “paña riba cabes” di Lahalah. Aki miembro di D66 Rob Jetten den un declaracion a mustra riba un “tweet bieu” di e minister nobo di Asilo y Migracion Marjolein Faber (PVV) cu a yama Lahlah den e “post” via Twitter di ta e “paña di cabes di PvdA”.
Durante e declaracion fuerte Jetten (D66) den Tweede Kamer, Jetten a demanda pa e actual premier Schoof tuma distancia for di e tipo di declaracion aki di Faber y pidi despensa. Schoof a dirigi su mes den direccion di Lahalah bisando “ Pasobra bo tin un paña na cabes, no ta haci diferencia pa mi. Pa mi bo ta gewoon un hende”.
Despues cu Schoof a haci e declaracion aki, Lahlah mes a bay na e “spreekstoel” den Tweede Kamer haciendo uzo di su “persoonlijke feit” expresando su mes den un forma fuerte, entre otro: bisando cu “bistimento di un paña na cabes ta un escogencia, liber y consciente. Pa tur mucha muhe cu ta bista un paña na cabes y ta sinti nan ofendi, no laga ningun hende tuma bo haci (laat je niks wijsmaken)”.
Frans Timmermans (GroenLinks-PvdA) a haci un yamada riba e prome minister Hulandes Schoof pa obliga Agema pa “delete” e “tweet” di inmediato. “Esaki ta e unico manera pa reestablece e unidad di e gabinete. E lider di GroenLinks-PvdA a bisa: “Esaki ta un circo, no un gabinete serio.”
Den Tweede Kamer a sigui diferente pleito entre e fraccionnan di coalicion. Despues di lider di VVD Dilan Yeşilgöz a bisa cu ta Wilders ta tras di e tweet di Agema, E lider di PVV den persona di Wilders ta bisa cu esaki ta “un acusacion vies, y sushi.”
