Prome cu aña a cera, diferente organisacion ambiental y tambe companianan cu tin naturalesa na pecho a bini hunto pa celebra e gran logro di 1000 mata planta cu e fundacion Ban Lanta y Planta.
Durante e ultimo añanan Minister Arends y su team tabata tin e placer pa pone man na obra y experiencia crecemento di cada mata cu e fundacion a bin ta planta na e Bucuti & Tara GMC Nature Preserve. Sigur un logro remarcabel cu ta cultiva un ecosistema floreciente.
Esaki ta demostra cu di pasonan chikito te na e esfuersonan grandi, tur hende por hunga un rol den conservacion di Aruba su naturalesa. Ta un orguyo pa mira con e comunidad di Aruba ta uni pa preserva e beyesa natural di nos isla.
Palabra di gradicimento na e fundacion su team completo, specialmente Anita Mijts-Aerts y Jeroen Van Dasselaar como tambe tur boluntario y organisacion cu ta asisti pa hunto yuda Aruba su naturalesa recupera.
Ministerio di Naturalesa ta habri 2024 cu deseonan pa mas avance di iniciativanan ambiental tanto riba tera como bou di awa.
