Den e ultimo dianan a lansa hopi informacion troci den direccion di CAPA, e cooperativa di miembro di SEPPA. Informacion cu tur mal intencion pa desacredita e cooperativa insinuando cu placa di e miembronan ta na peliger y cu e miembronan mester saca nan placa afo.
Den un reunion general bon atendi diaranson, 23 maart 2022, e miembronan presente a haya un presentacion cu splicacion amplio y completo di e motibo como tambe di tur loke e carta di Banco Central di dia 14 januari ultimo ta encera.
Tambe e miembronan a haya un indicacion di tur loke ta e exigencianan di Banco Central y tur loke ya e Directiva a haci caba. Den sala, e miembronan a haci diferente pregunta y riba tur esaki a duna splicacion. Un cos si a keda bon cla, cu e carta di Banco Central NO tin nada di haber cu problema di placa of mal maneho di e directiva actual y cu e placa di e miembronan sigur ta den e cooperativa.
Ta di lamenta cu hende sin escrupulo y cu ta falta di informacion of e berdad di tur loke ta pasando, ta pretende di balota inteligencia di e miembronan y sembra panico innecesario.
Mas lamentabel ainda hasta mal informacion cu ta sali di hende cu mester a busca pa sa prome cu core papia of insinua cos sin pia ni cabes.
Na final e berdad semper ta sali na cla y ta pa e motibo aki mes, directiva a opta pa ignora esaki y duna e miembronan informacion prome cu sali afo y mustra e actitud di malicia di hendenan cu menos bon intencion.
Na final di e reunion aki, e miembronan presente a mustra nan sosten p’e trabaonan desplega di banda di Directiva CAPA. Pero tambe a duna e confianza pa Directiva sigui cu e trabaonan na bienestar di e cooperativa.
E miembronan tambe a compronde cu no por sigui tras di informacion bruha di ningun hende, tampoco di un of otro medio di comunicacion, cu tin como unico meta, pa crea panico y desunion den e cooperativa mas grandi na Aruba.
CAPA ta pidi tur miembro pa sigui informacion cu solamente ta sali di CAPA den forma oficial. No bay tras di hende cu mente bruha. Ta importante p’e miembronan sigui atende e reunionnan di CAPA na unda cu ta duna informacionnan valioso y asina bo ta keda informa y evita di cay den wega bruha.
Directiva ta sigui cu su trabaonan, cu e meta fiha pa sigui padilanti y tambe Directiva kier a gradici tur esunnan cu a presenta n’e reunion general y ta spera di sigui wak e presencia sigui crece.
