Nos Planete Tera, cu tur su habitantenan, tanto especie humano, animal, vegetal y micro-organismo ta bao presion extremo, confrontando multiple menasa. Cambio climatico, subida di nivel di lama, desertificacion y escasez di awa dushi, perdida di tereno pa agricultura, polucion di ocean y alabes aumento di malesa resistente na antibiotica, un cantidad creciente di malesa cu ta pasa di animal y insecto pa ser humano a consecuencia di perdida di habitat, degradacion di ecosistema, un cantidad alarmante di ecosistema vital cu ta disparce y especienan birando extincto debi na actividad humano.
Economia global y economianan nacional apenas a cuminsa recupera di e impactonan devastador di e pandemia di COVID-19, cual a reduci e capacidad di hopi nacion pa reboot drasticamente y crece nan economia pa crea cupo di trabao nobo, provee servicio basico pa ciudadanonan, reduci pobresa, mehora infrastructura nacional pa salud y crea condicionnan mediante educacion, innovacion, ciencia y tecnologia pa diversifica economia, cu resiliencia incorpora y e capacidad pa cumpli cu e Obhetivonan di Desaroyo Sostenibel y fiha metanan pa reduccion di gasnan invernadero.
E conflicto na Ucrania a crea problema nobo di un escasez severo di recurso energetico di combustibel fosil, pa un ola masivo di refugiado y un falta creciente di producto basico di agricultura acopla na un aumento rapido di prijs pa producto basico agricola riba mercado internacional, resultando di e caida den exportacion (di ingrediente pa) fertilizante y exportacion di producto manera trigo, cereal y azeta comestibel, di cual Ucrania y Rusia ta exportadonan grandi riba mercado internacional.
Hasta tur industria cu ta uza microchips den nan producto a keda impacta pa e guera na Ucrania. Tur esaki ta causando atraso serio den cumplimento cu metanan pa combati cambio climatico, e Obhetivonan pa Desaroyo Sostenibel, y proteccion mundial di biodiversidad y ecosistema, di cual ultimo algun ta vital pa nos siguridad alimentario y salud global.
Lamentablemente nos planeta no por warda mas, pasobra si ser humano tarda pa cumpli cu deadline urgente, lo ta demasiado laat pa scapa Planeta Tera.
Nacionnan Uni y Earth Day Network pa 2022 a scoge e tema “Inverti Den Nos Planeta” pa Dia di (Mama) Tera, pa enfatisa e necesidad pa pone tur hende, sector priva y gobierno en particular participa cu tempo, recurso y esfuerso pa salba Planeta Tera. Dia di (Mama) Tera no ta suficiente y pesey Rainbow Warriors Core Foundation a crea un campaña nobo cu ta core di 8 di april te cu 8 di juni, yama “Eight to Eight, Because Our Planet Can’t Wait”.
ENFOKE Y SHOWCASE PA ISLANAN CHIKITO DEN DESAROYO
Na Aruba, Universidad di Aruba tin un facultad unico yama SISSTEM, cu e meta pa crea “Smaill Island Solutions through Science, Technology, Engineering and Mathematics”, sosteni pa un colaboracion cu Universidad di Leuven (Louvain/Lovaina) na Belgica financia cu fondonan di Union Europeo.
Aruba tambe tin un mescla unico di fundacion pa investigacion cientifico, un cantidad di inicitiava pa citizens’ science y innovacion, tecnologia agricola y un monton di proyecto di energia solar y di biento. Esaki, den combinacion cu nos lasonan cu Union Europeo atravez di Reino Hulandes, ta haci Aruba excepcionalmente califica pa demostra esfuerso y tecnologianan pa resolve problemanan cu islanan chikito den desaroyo ta enfrentando, pero tambe pa traduci e solucionnan aki pa uzo global.
EIGH TO EIGHT, BECAUSE OUR PLANET CAN’T WAIT
E campaña aki ta core anualmente di 8 di april pa 8 di juni. E tin un triple enfoke.
DECADANAN INTERNACIONAL Y DI NACIONNAN UNI
Lo cubri e tematicanan di lo siguiente:
- Decada Internacional Di Lenganan Indigena (2022-2032)
- Decada di Nacionnan Uni pa Envehecimento Saludabel (2021-2030)
- Decada di Nacionnan Uni pa Restoracion di Ecosistema (2021-2030)
- Decada di Nacionnan Uni di Ciencia Oceanico pa Desaroyo Sostenibel (2021-2030)
- Decada di Nacionnan Uni di Agricultura Familiar (Cunucu, agricultura escala chikito) (2019-2028)
- Decada Internacional pa Accion “Awa Dushi pa Desaroyo Sostenibel” (2018-2028)
- Decada di Nacionnan Uni di Accion pa Nutricion (2016-2025)
- Decada di Nacionnan Uni di Energia Sostenibel pa Un y Tur (2014-2024)
AÑANAN INTERNACIONAL
Lo destaca::
- Aña Internacional di Ciencianan Basico pa Desaroyo Sostenibel (2022)
- Aña Internacional di Pesca y Acuacultura Artesanal (2022)
DIANAN INTERNACIONAL
- Dia Internacional di Vuelonan Espacial Tripula, April 12
- Dia Mundial di Creatividad y Innovacion, April 21
- Dia di (Mama) Tera, April 22
- Dia Mundial di Buki y Derecho di Autor, April 23
- Dia Mundial pa Siguridad y Salud na Trabao, April 28
- Dia Mundial pa Libertad di Prensa, Mei 3
- Dia Mundial di Parha Migratorio, Mei 14
- Dia Mundial di Telecomunicacion y Sociedad di Informacion. Mei 17
- Dia Mundial di Abeja, Mei 20
- Dia Mundial pa Diversidad Biologico, Mei 22
- Dia Mundial di Bicicleta, Juni 3
- Dia Mundial di Medio Ambiente, Dia Mundial pa Combati Pesca Ilegal, No Raporta y No Regula, Juni 5
- Dia Mundial di Seguridad den Preparacion/Produccion di Cuminda, Juni 7
- Dia Mundial di Oceano, Juni 8
FORMATO DI E CAMPAÑA
E campana aki lo probecha di tur tecnologia existente di medionan di comunicacion y medionan social y lo utiliza “story telling”, esta den forma di un naracion continuo toca riba diferente tema y tambe atraves di comunicado di prensa, fact sheets, medionan interactivo, video y entrevista graba pa Facebook y YouTube, blogs, websites informa y inspira publico en general tocante tur e temanan pa motiva un y tur pa cuminsa pone man na obra pa desaroyo sostenibel na Aruba.
Pa enfoca kico ta haciendo na Aruba, lo provee video cortico pa pone riba Facebook y YouTube. Lo pone disponibel Fact sheets, tool kits y materialnan di informacion riba Internet y ta haci esfuersonan pa haya cobertura den medionan imprimi den forma di entrevista y articulo.
