Mayornan di atletanan di dos team di 11/12 y 13/14 cu a wordo acerca pa Gregory Chirino pa bay representa Aruba na Cartagena, Colombia, cual mas cu un luna atras a cuminsa recauda depositonan pa paga na Avianca supuestamente ta sinti nan mes estafa. A bay airport y nan no tabata reserva riba e vuelo. Hopi trabou e mayornan a haci pa asina logra e fondonan pa e biahe. E intencion tabata pa sali pa Colombia pa participa den encuentro deportivo di baseball.
Tabata tin festival di soppi caminda cu varios mayor a bende carchi pa por recauda fondo, cual placa no sa unda a bay, pasobra e no a wordo deposita na Avianca pa nan por a biaha. Asina mayornan a conta durante un reunion cu Polis na Ayo.
Su siguiente siman tabata tin knockout di softball cual tampoco sa unda e fondo ta.
Pagonan na aerolinea no a wordo haci. A wordo bisa cu pagonan a wordo haci, pero te dia di awe no a mira ni un recibo di e pagonan haci.
Di Avianca a bay Copa y ora cu e team a bay mainta tempran aeropuerto, no tin ningun informacion di ningun mucha, di ningun pasahero den sistema pa biaha diamars. Awor aki tur hende ta na Centro di Bario Ayo ta exigi nan placa bek. Mirando con e situacion a bay cu no tin transparencia di pagonan haci. No tin nada. Tur hende ta exigiendo nan placa bek. Y por papia di un suma di 55 mayor. Si coy na 1100 y pico ta yega casi 60 mil of mas di placa cu e persona aki a ricibi den su man cash.
Ta trata aki di dos team di 13 mucha. Ta 26 mucha en total y cada un ta bay cu un mayor. Ta un suma basta grandi di placa. A haya diamars anochi, e informacion cu e placa a wordo manda pa un compania cu ta organiza tour na Colombia. Gregory Chirino a bisanan cu e tour operator aki lo mester a ricibi e placa y a manda e placa Panama. Un storia cu ningun hende no ta compronde.
Dicon no a boek esaki mes, pero a scoge pa manda e placa Panama. Ta loke nan a scucha. No a mira ningun recibo riba esaki. Chirino a duna un waiting time pa dia 17 di Mei pa por haya e placa bek.
Cla pa bay
Dialuna anochi, e persona aki a manda un mensahe indicando cu nan a confronta nan mes cu un problema y cu e vuelo ta overbooked y no tin luga pa full e team, pero pa diamars atardi keda pending, cu lo tin un orario pa bula. Henter dia grupo di mayor a bay toch aeropuerto pa busca informacion. No tabata tin overbooking riba e vuelo di diamars ni di diaranson. No tabata tin charter regla pa diamars atardi. Tur cos a cuminsa cay den otro. A duna Gregory Chirino full e dia pa por trece prueba, bin cu tur cos y ta bin duna cara, pero nada di prueba. E ta kere cu e mayornan por bay su tras sin prueba.
E mayornan aki no ta keda te aki cu man crusa.
E persona aki no ta presidente, pero el a profila como delagado di tanto ABBA como Little League Aruba.
Mayoria mucha cual el a acerca di e team 11/12 ta muchanan cu a biaha bao di Little League, pa Santo Domingo, e mesun grupo aki el a acerca. Mirando cu e tabata delegado caba aña pasa, a dun’e e confiansa y a bay tras di dje pa mira kico ta e resultado.
Board
E mayor a splica cu ta trata aki di un Fundacion cu el a lanta, cu ta Fundacion Luz di Baseball Arubano. E ta presidente di e fundacion aki. E ta promove hopi baseball cerca muchanan hoben. Ora cu el a acerca tur mayor, a bisa cu e tin tres aña ta planea e biahe aki. E biahe aki ta encera cu e muchanan lo bula diamars pa Colombia y bin bek dia 6 di Mei. E campeonata yama Campeonato para Menores y automaticamente pa pasa pa fin di Juli, pa bay hunga baseball na Suecia.
Tur cos ta encera pa muchanan hoben.
Bo por traha pa mucha, pero bo mester tin transparencia pa tur mayor, of bo miembronan di comision. Bo mester tin recibo na man. No ta trata di tiki placa aki, pero di hopi placa y tur mayor a traha hopi duro pa nan placa y/of fundraising haci tambe.
Esey ta loke ta boga p’e. Awor aki cosnan a bay hopi fo’i sla, mirando cu no tin mucho claridad y prueba poni riba mesa. Pruebanan cu a wordo treci, no ta mucho cla tampoco. Bo no ta kere e pruebanan aki tampoco.
Sumanan grandi
Ta sumanan di riba 60 mil florin cu no tin recibo. No tin prueba di deposito haci na aerolineanan. Nada di esey. Una bes cu bo ta ricibi placa di mayor pa paga aerolinea, una bes cu bo bay un aerolinea, tur aerolinea of tur caminda mester duna un recibo di pago. Esey no a wordo entrega of mustra na ningun mayor.
Dicon no a puntra prome
Un di e mayornan tabata miembro di e comision. Pero a laga e comision aki pa motibo di esey. Ora cu a cuminsa sinti cu cosnan a cana straño, a cuminsa pidi pruebanan. Ora a haci esaki, a haya como contesta cu esey no ta cay bao di su persona. Pero ta cay bao di su persona cu ta na cabes. Djey e mayor a laga e comision aki pasobra no por traha asina. Den un comision tin cu traha transparente y/of cu e mayornan tambe transparente. 
Nos mesa di redaccion a logra haya e tour operator di Colombia cu Gregory Chirino a menciona di a manda placa. E organizador a splica cu Gregory Chirino den su desesperacion kiet yudansa despues cu no a cumpli cu pagonan. E tabata pidi pa na paga tur e ticketnan adelanta. Varios oficina di pasashi Gregory Chirino a acerca pa reservacion. El a haci reservacion pero nunca a logra cancela e ticketnan y dimes tur hende ta cay afo di e sistema. Na ultimo momento berdad el a logra manda 47 mil florin cu a yega diabierna. Cos cu mester a yega for di aña pasa caba. Hopi mal organiza di parti di Gregory Chirino cu ta desespera y kier pa e operador di Colombia yude sali di e problema cu el a causa pa incumplimento. E operador a bisa cu unda cu e tabata yega pa reserva, ya caba Gregory Chirino a pasa y nan no kier a copera mas pasobra no a cumpli. Awor cu e placa a yega diabierna Colonbia, a bay over na transfer esaki pa Panama pero e transfer a ser blokia. Eynan tur cos a cay na awa. E operador di Colombia a splica e mayornan caba. Ta dura awor diez dia pa release e placa cu lo ser manda bek Aruba y asina cada ken lo haya nan parti bek. Ta un suma di 47 mil florin. E operadora di Colombia no tin nada di haber cu e preparacion. Mas bien Gregory Chirino den desesperacion a core acerca pa mira si nan por yude y hasta adelanta e pagonan pa ticket di avion y despues reservacion di Hotel. E operador no tin ningun clase di palabracion den e preparacion. Kiermen awe no por culpa e operador.
Ta na ultimo momento Gregory Chirino a core den su desesperacion purba haya yudansa. Sin placa ta dificil. E operador no ta bay risca nan placa pa incumplimento of mal preparacion di un organizador. Finalmente Polis cu a topa e mayornan den e reunion a scucha tur hende. Djey a bisanan mesora kico ta e caminda pa cana. E intencion tabata pa pidi ordo di detencion pa Gregory Chirino. Esaki no a tuma lugar. Ta duna beneficio di duda pa e placa cu lo dura 10 dia pa release esaki y mande bek pa Aruba. Si esaki no sosode ta sigui cu e procedura mas leu. E operador di Colombia ta lamenta cu Gregory Chirino a hinca nan empresa den un spot malo asina den su desesperacion. Nan ta prepara tripnan pero cu full pakete y esey a splica Chirino tambe. Hasta den desesperacion Chirino a pidi e operador pa book charter. Nan por yuda pero mester paga y ta 49 mil dollar. Hasta esey e kier pa nan adelanta. Despues a pidi 10 mil florin pa cubri e hotel. Tur esaki a splica Gregory Chirino cu ta imposibel. Spera cu e splicacion di e operador ta cla pa e mayornan cu lo haya nan placa y asina nan rato amargo ser lubida.
