Diasabra anochi polis a presenta cu urgencia na Tanki Leendert p’un caso di hincamento. Na yegada di polis na Sunflower Minimarket no a topa cu nada, ni cuchiu, sanger, victima y tampoco e sospechoso.
A cuminsa busca den e area y na Tanki Leendert # 161-B a topa cu un homber c’un hinca den ribchi. El a conta polis cu un rato prome un tipo a sac’un cuchiu basta grandi y hinc’e.
E hinca no tabata profundo, pa cual e victima tabata stabiel. E victima conoce esun cu a hinc’e. Ta trata di un problema di bario. Parce caminda e situacion a surgi tabatin henter un helengue cu tiramento di piedra. etc.
Polis a tuma tur informacion necesario. Un rato despues, recherche a presenta y a sigui cu e caso. Nan lo investiga kico exactamente a sosode. Ya polis tin indicacion ken e persona ta caba y den ki auto el a bandona. Ta buscando su parandero, no ta descarta cu prome cu dia cera, lo pone man riba dje.
