E cas ta uno conoci p’e ex-alumnonan di tanto Rosa College, Rosario College y tambe Maria College. Den e añanan 80 señora Maria Hendrick tabata bende su mangelnan, cakiña, chupabebe, etc, na tur e alumnonan cu tabata bin cerca dje.
Pero actualmente no tin hende ta biba eyden. Por lo menos, esey tabata e pensamento. Diaranson mainta algun persona cu ta encarga cu e cas, situa net n’e skina di Consessielaan y Zuster Cherubinnestraat, a habri e cas, a drenta y a bin topa cu un sorpresa no mucho agradabel.
Riba esaki, vocero suplente di polis, Liliana Rasmijn, a splica cu pa 8:58 am, central ta haya informacion cu na momento cu a habri e cas pa hacie limpi, ya cu ta un cas cu no tin hende ta bibando aden y ta na benta, esunnan encarga a bin topa cu un curpa sin bida.
E diferente departamentonan di polis a presenta di biaha entre otro BFTO, Polis Tecnico y tambe recherche. Debi cu e curpa a decompone asina hopi, cu un parti di dje ta skelet. No sa si ta trata aki di un hende homber of un hende muhe. A confisca e curpa pa mira si en caso por trata aki di un delito of no. Parce cu e curpa ya tin un tempo den e cas, pues no por a saca afo mucho mas.
Te asina leu, mucho no por bisa. E caso ta bao di investigacion y mientras cu haya mas informacion, lo divulga mas riba e caso aki.
Rasmijn a sigui splica cu segun cu por a compronde di e personanan encarga cu e cas, e luga ta cera. Ta basta tempo no tin hende ta biba aden. Awo e pregunta ta con e persona a drenta eyden, no ta conoci. Aworaki tur cos ta bay di investigacion pa por saca afo ken e persona aki ta.
Si tin hende cu tin informacion of ta sinti algun inkietud, por tuma contacto cu polis, yamando tiplijn 11141, laga e informacion y si kier ta laga un number di telefon y lo tuma contacto. Unabes cu duna informacion, duna esaki mas detaya posibel pa por yega na soluciona e caso lamentabel aki.
