Dia 30 di juni ultimo a sosode un caso hopi serio, cu por a costa bida di un comerciante chines. Aki ta trata di e director di Cheng’s Supermarket cu a hera perde su bida. Un otro comerciante Chines a bin pa mata William Cheng cu un chapi.
E sospechoso X. Zhao di 58 aña a yega cu tur trankilidad den su pickup. E tabata bon na altura cu tin reunion andando di e directiva nobo di e asociacion Chines. El a baha for di e pickup, bisti su mondkapje y a pasa man pa su chapi den baki pickup. Cana drenta e club y bay directamente na e mesa di reunion. Eynan William Cheng parce tabata dirigi e reunion. E tabata na cabes di e mesa.
X. Zhao a bay directamente unda William Cheng tabata sinta. El a lanta e chapi y mand’e pa mata William. Pa un cabey William a scapa di su morto. E chapi a dal duro riba e mesa. X. Zhao a hera William y e chapi a solamente dal’e na su brasa.
E otro comerciantenan Chines na mesa a reacciona mesora y algun a lanta bay riba e sospechoso. A purba calm’e y asina a logra kita e chapi for di dje. A logra tambe haya Zhao pafo di e edificio y e chapi a ser hiba poco mas pariba caminda e matanan ta. Djey Zhao a bandona e sitio.
Parce el a dura basta prome cu a dicidi di haci denuncia. E acto aki ta serio. Tur loke X. Zhao a haci a ser graba desde su yegada te su salida. Na Club Chines tin camera di siguridad y ni maske X. Zhao nenga, e no por scapa di loke el a comete. El a bin pa mata y na caminda pa Club Chines ningun momento el a reconcilia of pensa ki tur su intencion por trece cune.
Recherche di Noord a cuminsa cu e investigacion, asina cu William Cheng a entrega keho di intento di asesinato contra su compatriota. Diahuebs mainta a bay pa detene X. Zhao net ora e tabata na Winter Garden Supermarket na Savaneta. E detencion no a bay facil. X. Zhao a resisti su detencion y recherchenan mester a haci uzo di extra forsa pa domin’e.
E yiu homber no a aprecia e forma cu a trata su tata. Aparentemente e no sa kico su tata a haci. E ta acusa e polisnan di a maltrata su tata durante e proceso di detencion pafo di e supermercado. E ta reconoce cu e tata a altera na un principio pero despues cu el a entrega caba, ainda a maltrat’e.
No ta conoci pa nos tampoco kico ta e motibo cu X. Zhao a tuma un actitud asina pisa pa arma su mes cu un chapi y bay Club Chines pa purba mata e comerciante William Cheng den pleno reunion di directiva. Loke si por bisa cu William Cheng tabata presidente y den e un eleccion recien el a perde y otro directiva mester a tuma over. Segun por a compromde e directiva cu a perde a laga sa cu e eleccion no a bay den forma corecto. Pesey mes mester bay yama un eleccion nobo.
Prome cu eleccion pa directiva ta hopi problema tabata tin entre e miembronan. Cada biaha polis mester a bay pa calma e problema serio entre e miembronan di e Club Chines. Tambe a compronde cu ademas di malcontento cu e resultado di e eleccion y con esaki a bay, tin tambe un diferencia di opinion entre e comerciantenan y otronan den directiva relaciona cu e asunto di container di cuminda cu a parti durante e temporada di Covid. E tempo ey hasta gobierno a ser invita y a haci basta PR cune. Un situacion tristo cu por tabata tragico pa rabia entre e comerciantenan y miembronan di Club Chines.
