E siman aki auroridad Colombiano a detene David Ricardo Tromp, naci na Aruba, cu nacionalidad Hulandes, acusa di ta trafica droga pa y/of for di Colombia pa Hulanda y China.
A identific’e como e posibel líder di un red criminal dedica na trafica cocaína via avion, den maleta of den pertenencia di pasahero, saliendo for di aeropuerto di Cartagena, aeropuerto Bolívar, cu destinacion Hulanda y China.
Como tal, Tromp awo ta enfrenta acusacionnan pisa manera traficacion, fabricacion of di ta den posecion di droga.
E investigacion preliminar ta indica cu posiblemente e Rubiano aki lo por ta responsabel pa recluta personanan y convence nan pa biaha pa destinonan internacional selecciona. Den e proceso e ta regla pasashi, hospedahe, transporte, cuminda y bebida…den un solo palabra, ta regla tur cos pa nan. Y tur esaki, pa e pasaheronan por sigura cu e droga ta pasa trankil di un pais pa e otro sin problema.
Tromp awo ta den man di husticia Colombiano pa investigacion y pa husg’e eynan. No por descarta cu Hulanda y China na dado momento lo por pidi su extradiccion tambe pa persiguie y conden’e ey pa e crimennan cu el a comete den e dos paisnan ariba menciona.
