ECUADOR
Ecuador ta bibando dos dia di teror. Despues cu presidente di e pais, Daniel Noboa, a decreta estado di excepcion y toque de queda, dialuna a registra e secuestro di dos polis, cendemento di auto na candela y otro atakenan. Pero e violencia no a stop y diamars tabatin mas accion criminal.
Trempan, riba e rednan social a circula un video atribui n’e delincuentanan cu lo a secuestra tres polis den e ciudad Machala, zuidwest di Ecuador. Den e video nan ta lesa un comunicado unda cu nan ta menasa Noboa: “Bo a declara guerra y guerra lo bo haya. Bo a pensa cu bo pianan y awo bo mester asumi e consecuencianan di bo foutnan. Bo ta declara estado di excepcion, nos ta declara guerra na polis civil. Cualkier persona haya riba caya despues di 11:00pm lo wordo ehecuta.”
TOMA DI UN CANAL DI TELEVISION
Diamars atardi a registra e acto cu mas a alarma e poblacion. Ta trata di e toma di e canal TC Television, ubica den e ciudad di Guayaquil, provincia Guayas. E delincuentenan, bisti cu capuchon y arma, a retene e trahadonan, un accion transmiti bibo y directo pa al menos 15 minuut.
Decenas di periodista- y camarografonan a pidi yudansa pa medio di e groupchatnan di Polis Nacional y sevicio di siguridad ECU 911. Incluso a pone un arma na cabes di e periodista Jose Luis Calderon y despues nan a pone un taco di dinamita den su saco. Mientras tanto, e periodista, na rudia tabata pidi pa nan no hacie daño.
Hefe di redaccion di e noticiero, Alina Manrique, a conta loke nan a pasa aden: “Nan a pone un arma na mi cabes. Mi a sufri. Mi ta den panico. Mi a pensa den mi bida completo, den mi dos yiunan.”
Algun minuut despues cu emergencia a presenta, Polis Nacional a informa cu el a interveni den e luga, a evacua e personanan y a captura e delincuentenan. E institucion a confirma cu den total tabata diestres persona.
“Polis a drenta pa purba tuma e control over. E delincuentenan, seis di nan cu tabata den e set, a bisa nan pa bay of nan lo mata nos. Ami tabata yora so di panico. Na final, e delincuentenan ora cu nan a wak cu nan no tabatin salida, a entrega nan arma. Mi a brasa e polisnan. Nan a duna mi un man y a yuda mi lanta for di vloer, ” Manrique a bisa.
Mas despues, polis a informa un total di ocho morto y dos herido durante e dia di violencia na Guayaquil, e corant El Universo a informa.
DECRETO NOBO
Mientras esaki tabata sosode, un decreto nobo di Noboa a sali na claridad, cu tabata un modificacion di esun di dialuna y den cual e ta reconoce cu den e pais ta existi un “conflicto arma interno”. Mediante su decreto, e presidenta a identifica varios gruponan di crimen organisa transnacional manera “organisacion terorista y actornan no estatal agresivo.”
PRIZON
Como conclusion di tur e echonan aki ta haya e crisis den e prizonnan. For di dialuna, e presonan di varios prizon tin e guianan penitenciario reteni.
E situacion aki a genera un dia despues di cu a dialuna a bira conoci cu José Adolfo Macías Villamar, alias ‘Fito’ a huy. E tabata lider di e banda criminal Los Choneros y cu lo tin vinculo cu e Cartel di Sinaloa di Mexico. E tabata cera den un parti di siguridad maximo di e Prizon Regional, den e provincia di Guayas.
Hunto cu ne Fabrico Colon Pico, lider di un celula di e grupo delictivo, Los Lobos captura diabierna marduga a huy for di e prizon di Chimborazo, apenas tres dia despues. Fiscal di Ecuador, Diana Salazar, a acus’e di ta tras di un plan pa atenta contra di dje y su famia.
