24ora.com a haya algun reaccion riba e situacion cu a cera e entrada di Andicuri. Riba rednan social tambe por wak’e y a haya algun yamada tambe di hendenan cu kisas no ta contento.
Pero den e caso aki esnan cu a cera e area aki ta nan doño, cu nan motibo. E tereno aki no ta un tereno di gobierno. E no ta un huurgrond, e no ta un erfpacht. E ta mas bien un tereno propiedad. Eigendomsgrond.
Algun aña pasa a cumpra e tereno aki cu e intencion di traha un hotel. Algo cu no a concretisa. Hotel no a concretisa, pero e ta keda cu su doño. Doñonan cu tambe ta care pa loke ta e parti di naturalesa, etc.
Loke a pasa diahuebs, ta cu nan a dicidi di cer’e cu baranca pa prohibi y evita entrada di vehiculonan di motor. E motibo cu nan a duna 24ora ta cu nan a cuminsa tuma nota cu e vehiculonan di motor ta causando hopi daño den e area riba nan propiedad.
Esta ATV, UTV, Jeep, etc. E autonan cu ta offroad ta causando daño na nan propiedad y e naturalesa cu tin den e vecindario aki.
Autonan ta yega, nan no por pasa. Pero, den e mesun rosea, e doñonan a indica cu esnan cu kier pasa, hobennan cu kier pasa pa bay haci bodyboarding of esnan cu kier pasa na pia, of esnan cu kier pasa cu bicicleta, sinti nan mes liber, pa pasa den e tereno aki. Nan no ta stroba ningun hende di pasa.
Pero kier evita cu vehiculonan cu ta haci offroad, manera ya menciona, pasobra nan a tuma nota cu e pasada di e vehiculonan aki a causa hopi daño riba e tereno y naturalesa cu tin den e vecindario aki.
Ta informacionnan cu nos a ricibi, mirando e discusion cu tin riba rednan social e momentonan aki pa loke ta e ceramento di Andicuri.
Den pasado e otro doñonan a hasta pone cura di hero pa ningun hende drenta. Cu tempo nan a bend’e. E doñonan nobo tabata flexibel y a lag’e. Awo nan a mira e daño na e naturalesa cu e vehiculonan ta causa y a dicidi di cer’e, mirando cu ta nan propiedad.
Pa por yega Andicuri, mester pasa den nan tereno, lagando esaki habri toch, pa e hoben cu ta bay bodyboard, e ciclista cu ta train y esnan cu ta pasa na pia, sea grupo di famia, etc. pa pasa liber trankil.
Esaki ta pa aclarea cualkier discusion, pasobra e tereno aki no ta di gobierno. E ta un tereno propiedad cu a cumpra for di e doño anterior, cu tambe e tempo ey tabata tin masha problema decadanan atras, pa motibo cu nan no tabata kier pa brommer, auto, etc. pasa riba nan tereno. A permiti hopi aña bek, pero awo e daño riba e tereno ta hopi grandi y no kier pa esaki sosode mas.
