Ta imagina cu for di mas o menos 4:00 am, un of mas individuo cu menos bon intencion, a logra subi e tereno patras di EcoTech Freezone na Barcadera y a cende un sero di sushi na candela. Pero tabata pa mas o menos 6:00 am cu e candela a crece bira grandi, pa cual a activa tur autoridad competente.
Un tereno como “back up”
E candela no tabata na e instalacionnan di EcoTech na Ser’i Teishi pasobra ey ta dera “bales”, pues no tin nada pa kima. A cende candela riba un tereno net patras di e edificio di EcoTech, unda ta warda sushi seco pendiente pa pasa door di e mashin, cu a conoce poco reto y ta den mantencion. Specialmente taira a pega na candela lihe y a percura pa basta huma preto y inconveniencia pa e bario.
Ta investigando
Desde aña pasa cu ta uzando e tereno aki como un “back up” pa ora nan mashinnan faya of ta den mantencion, nunca tabatin problema cu candela. A percura pa siguridad eytras y camara di vigilancia, pa cual ta analisando e grabacionnan pa mira ken a subi e tereno eytras den marduga pa causa molester na e bario.
A bati alarma mesora
E candela a crece den un rato di ora y a bira masha grandi, provocando un huma preto y diki cu a extende p’e barionan den cercania, incluyendo Cas Paloma, Parkietenbos, Bucutiweg y vecindario. Cuerpo di Bonbero a yega na e sitio pero a opta, segun nan maneho, pa no haci nada y conseha EcoTech pa laga e candela paga su so. Sinembargo, e molester tabata hopi y demas autoridad a haya nan obliga di interveni di inmediato y tuma medida di precaucion pa proteha e habitantenan afecta.
Incidente y reaccion inicial
Polis a informa cu Cuerpo di Bombero a raporta e candela na e parti patras di Ecotech. Segun Liliana Rasmijn, vocero di polis, e bomberonan a acudi n’e sitio pa combati e candela pero a haya nan cu material peligroso cu a complica e trabou. “Nos a dicidi laga e candela kima su so. Despues di a contene material flamabel cu, door di uza awa pa pag’e, por aumenta e duracion di e candela,” asina Roland van Cleef, Officier van Dienst di Cuerpo di Bombero a splica. Mester menciona cu ta e mesun modus operandi aki ta aplica na dump na Parkietenbos ora cu tin candela.
Impacto den comunidad
Polis a alerta habitantenan di Bucutiweg, Cas Paloma y e areanan cercano na aeropuerto riba e situacion, recomendando nan pa busca refugio temporal den e otro zonanan debi n’e huma. Salud di e habitantenan sigur ta un prioridad. A conseha pa bay temporalmente for di e area te ora cu e huma bay, ta loke cu Rasmijn a enfatisa.
Rene Ridderstap di Crisis Management Office (CMO), a subraya e importancia di e medidanan di precaucion p’e residentenan, specialmente p’esunnan cu tin salud delicado. A recomenda n’e personanan vulnerabel pa nan refugia na cas di famia of amigo te ora declara e zona sigur.
Prevencion y accion futuro
Van Cleef a sigura cu, aunke e candela lo sigui pa hopi ora mas, cu ya e tabata bao di control y no a representa peliger mayor di expansion. Bombero a pronostica cu candela mester paga despues di merdia. Lo a evalua e situacion continuamente pa dicidi e proximo pasonan, segun Rene Ridderstap.
EcoTech mes a asumi responsabilidad
No obstante cu Cuerpo di Bombero a dicidi cu no ta paga e candela y lag’e sigui kima bay numa, toch gerencia di EcoTech a pensa diferente. Aunke no ta nan a cende e candela, nan a asumi nan responsabilidad mesora. A yama algun truck di ATCO Aruba, pa recoge santo y paga e candela cu ne. Den un ora y mey nan a domina e candela completo. Es mas, e oficial di bombero a bin bek y topa e candela paga, pa cual el a gradici e compania pa nan intervencion rapido y pa stop e inconveniencia na e bario.
Nan mesun brigada
Ta di dos biaha cu e companianan resortando bou di MetaCorp ta haya nan mes ta asumi rol di bombero pa combati un candela, cu de facto no ta di nan. E prome tabata dia Daltra a pega candela na Barcadera tambe y cu Cuerpo di Bombero no tabata capas di combati e candela, por lo menos no cu e rapides pa evita expansion y menas riba e instalacionnan di APEX y AruGas na e otro banda. E mesun ATCO y APEX mester uza nan trucknan y santo pa paga e candela. E biaha aki no tabata un excepcion. Ta haci cu awo ta evalua pa, miho crea nan mesun brigada, pa den caso di emergencia, por activa mesora y evita daño grandi.
No mester a evacua
Cu e rol proactivo di EcoTech pa combati e candela nan mes, contra conseho y decision di Cuerpo di Bombero, a haci cu no mester a evacua e bario. Pa ora cu mainta a habri ya e candela tabata domina y e huma preto a somenta. Obviamente cu santo ta duna un miho resultado den tipo di candela asina, compara cu e uzo di awa.
