Awe cu mundo y Aruba ta celebra Dia di Duana, director di e departamento Ricky Croes a repasa un poco e trabou y e avancenan cu a logra ultimo tempo.
Celebracion di Dia di Duana ta un fecha proclama door di World Custom Organisation y cu Aruba a tuma como un fecha pa refleha riba e trabou y su importancia. Ta repasa kico a logra y kico tin pa haci ainda.
E pandemia a causa hopi incertidumbre bou di e pueblo di Aruba, pero asina mes Duana mester a sigui traha y brinda su servicio na pueblo. Y hasta nan ta kere cu den tur e situacion reinante, lo traha pa sigui innova den nan servicio. Esaki apesar cu hopi no sa cu mester a adapta of corta e presupuesto di Cuerpo di Duana cu casi 50%.
Croes a bisa cu nan a constata cu poco poco e importacion ta subiendo atrobe y cu esaki e entradanan cu a cay drasticamente durante aña pasa.
Un tendencia cu nan a mira ta sigui crece ta e compranan online, via di website. Principalmente den e pandemia te awo, e hendenan na cas a cuminsa ordo cosnan online. No mester lubida cu esaki no ta afecta Duana, mas bien e ta yuda den e entradanan pa motibo cu nan tambe mester paga “invoerrechten”.
Duana desde 2014 a cuminsa cu digitalisacion, cuminsando cu e parti di “aangifte proces”, sigui pa “inklaring” di barco y tambe “vrijmaking proces”. Y tambe pago online. E proceso aki di digitalisacion a haci e trabou di Cuerpo di Duana mas eficiente, cu e Duaneronan controlando tur proceso via di un tablet. Antes tabata dura 4 pa 5 dia pa un persona haya su carga, pero digitalisacion e cliente por haya su carga e mesun dia.
