Diabierna ultimo tabatin e actividad ‘Encuentro Multicultural’, cual tabata un anochi hopi bunita riba Dia di Diversidad Cultural, cual lo sigui celebra dia 21 di mei.
Segun Minister di Asuntonan Economico, Finansa y Cultura, drs. Xiomara Maduro, Aruba tin 113 diferente nacionalidad y e tarima tabata yena di diversidad cultura cu nos pais ta conoci p’e, caminda cu den paz y harmonia tur ta biba hunto riba e pida baranca aki.
E minister tabata hopi contento di tur esunnan cu a acepta e invitacion pa a bin Cas di Cultura pa comparti un parti di nan cultura den nos cultura aki na Aruba.
E tabata bunita y sigur den su discurso, el a menciona cu locual ta uni nos ta nos dushi Papiamento. Tur esunnan cu a presenta na e luga, aunke cu nan a bin cu nan propio cultura, a halsa nos Papiamento.
Esey sigur ta loke a uni nos den tur diversidad cultural.
Siegfried Dumfries, director di Departamento di Cultura Aruba a enfatisa cu a base di e declaracion di Unesco cu dia 21 di mei ta dia di Diversidad Cultural, dialogo y desaroyo, a organisa pa prome biaha den un manera sistematicamente cultura den Cas di Cultura. No obstante COVID-19, un dia unda diferente nacion cu ta presente, bibando na Aruba, conhuntamente cu Aruba mes, por celebra nan cultura, nan folklore, un parti di nan gastronomia, cual lo bin despues ainda.
Diabierna anochi tabatin presentacion di e arte di baile y e parti folklorico di varios pais. Tabatin 20 pais presente den Cas di Cultura.
Dumfries a menciona di ta contento cu e lider di e proyecto Jhon Freddy Montoya, hunto cu e Ministerio di Cultura y Unesco, por a organisa e anochi aki, cual tabata hopi placentero.
“Bo ta parti di nos comunidad. Esey e ta,” segun Dumfries. Ora bo ta parti di un comunidad bo ta integra y tin espacio pa por presenta loke tin cu ofrece na e resto di comunidad y conhuntamente biba na paz, cu amor y union cu otro, Dumfries a termina bisando.
