Recientemente Departamento di Asunto Social a organisa un evento riba Demencia cu un sala completamente yen na MFA Paradera. E ta mustra tambe e importancia di brinda informacion na nos comunidad, specialmente na adultonan mayor cu nan famia. Diferente topico a trata durante e saki manera factornan di riesgo pa Dementia y nuebe manera pa reduci riesgo di esaki. Mas di 125 hende a bini bao un solo dak pa intercambia y busca informacion.
E participacion den e anochi aki tabata grandi, un sesion hopi interactivo cu varios preguntanan valido. “Y esey ta mustra necesidad di e informacion valioso cu mester comparti cu e adultonan mayor,” segun Minister Ursell Arends, kende tambe tabata presente durante e encuentro aki. “Pa mi mira kico ta e preocupacion cu ta biba den adultonan mayor, pa asina tene esakinan na cuenta den e maneho cu nos ta implementando,” segun e mandatario.
![](https://24ora.com/wp-content/uploads/2024/02/IMG_3920-1920x1280.jpg)
![](https://24ora.com/wp-content/uploads/2024/02/IMG_3911-1920x1280.jpg)
![](https://24ora.com/wp-content/uploads/2024/02/IMG_3915-1920x1280.jpg)
![](https://24ora.com/wp-content/uploads/2024/02/IMG_3899-1920x1280.jpg)
![](https://24ora.com/wp-content/uploads/2024/02/IMG_3896-1920x1280.jpg)
![](https://24ora.com/wp-content/uploads/2024/02/IMG_3887-1920x1280.jpg)
E statistica di 2023 pa Departamento di Asunto Social (DAS) segun Noemi Maduro a mustra cu un di e categoria mas halto cu tin den e departamento pa cu problema, ta entre otro e parti di demencia, e parti di hende grandi. DAS a haci un analisis y opta pa cuminsa activa, drenta barionan y asina bay mas cerca di pueblo y bin cu anochinan informativo. “E ta un proyecto piloto cu a cuminsa den Paradera y nos ta bay ta otro luna den bario di Savaneta, despues na playa. E anochi ta dedica na Demencia/Alzheimer y duna tips concreto pa duna conseho riba ayudonan cu DAS ta brinda,” segun Maduro.
DAS tin diferente servicio y bao un solo dak na MFA Paradera a cuminsa na brinda informacion riba tur servicio den su totalidad. “E ta tremendo, un exito total. Akinan nos a haya hende for di tur districto.” Tambe Centro di Memoria tabata t’ey como moderador y brindando informacion na e masa di publico cu a presenta pa presencia e encuentro aki.
![](https://24ora.com/wp-content/uploads/2024/02/IMG_3886-1920x1280.jpg)
![](https://24ora.com/wp-content/uploads/2024/02/IMG_3880-1920x1280.jpg)
![](https://24ora.com/wp-content/uploads/2024/02/IMG_3877-1920x1280.jpg)
![](https://24ora.com/wp-content/uploads/2024/02/IMG_3872-1920x1280.jpg)
![](https://24ora.com/wp-content/uploads/2024/02/IMG_3865-1920x1280.jpg)
![](https://24ora.com/wp-content/uploads/2024/02/IMG_3862-1920x1280.jpg)
Si bo tin un situacion di un grandi of ta un cuidado informal, bishita DAS pa asina hunto cu e sistema por traha pa mehora na corto, medio y largo plaso. Pasobra e grandi ta importante, y p’esey DAS t’ey pa brinda servicio y guia.