Stichting Maneho Aruba su Carnaval (SMAC) a anuncia e premionan pa Carnaval 70. E banda popular, Tsunami a sali “Banda di Aña”. Tsunami a participa den Carnaval conhuntamente cu Champagne Carnival Group. E banda a participa cu un total di 12 cancion den e festival di Caiso & Soca Monarch, di cual 10 a pasa pa final…y orguyosamente a bay cas cu e corona di Soca King. Durante e temporada di Carnaval, Tsunami ta participa den tur parada organisa pa SMAC. Ademas di e paradanan di SMAC, Tsunami a acompaña diferente scol durante Parada Escolar.
Mester menciona cu den carnaval, normalmente caba, Tsunami ta un di e bandanan cu semper ta hala atencion. De facto, nan tin basta aña caba como banda di cas den e Grupo Champagne, conoci como un di e gruponan di mas organisa y mas grandi di carnaval. Como tal, e banda ta hay’e bou di un presion enorme tur aña pa sali bon, pa purba conkista coronanan, etc. E aña aki nan a bay cu e corona di Soca King y a gana e bataya formal riba caya tambe, door di bay cu Road Jam, por lo menos di e media mas grandi di Aruba!
![](https://24ora.com/wp-content/uploads/2024/02/HY3A0763-1-1-1920x1280.jpg)
No ta prome biaha
Mester menciona cu pa Tsunami, gana e premio distingui aki di Stichting MUSICA ta un honor grandi, pero no ta nan prome premio ni ta e prome biaha. E mesun fundacion aki cu ta traha na vanguardia di e musiconan local, a eligi Tsunami caba como “Band of the Year” na aña 2019, 2023 y 2024. Pues ta nan di tres aña cu ta bay cu e premio. E fundacion mes ta existi desde aña 2014 y a acorda cu SMAC cu nan ta organisa e Caiso & Soca Monarch pa dies aña largo.
![](https://24ora.com/wp-content/uploads/2024/02/band-of-the-year-2024-1607x1440.png)
Road Jam na mas media
Aunke 24ora.com ta, by far, e media di comunicacion mas grandi di Aruba y un di esunnan mas grandi den Caribe Hulandes, toch tin otro medianan cu tambe a eligi Tsunami y nan cancion “Mash up” como e “Road Jam” pa e aña aki. Por menciona cu na 24ora.com ta uza como criterio a voto publico, via nos plataforma di encuesta. E cancion cu haya mas voto, basa riba gusto di nos 190K siguidonan, ta bay cu e premio. Den caso di otro medianan, hopi biaha, nan ta aplica e criterio di e cancion mas toca nan dilanti durante paradanan di carnaval. Asina por menciona cu e otro medionan cu tambe a scoge e mesun “Mash up” di Tsunami como e cancion mas gusta y toca den carnaval 2024 tabata: Mike’s Disco; Ivo 4 Life, TeleAruba & Zayon On The Air; Top FM, Canal22 & Solo di Pueblo; Diario Tv Aruba, Mas Fm 105.1 & Masnoticia.com; Power 101.7 Fm; Galactica 99.9 FM y Cool FM.
![](https://24ora.com/wp-content/uploads/2024/02/WhatsApp-Image-2024-02-12-at-7.15.09-PM.jpeg)
Mas premio
E aña aki definitivamente ta di Tsunami, pasobra no ta solamente SMAC, pasobra Stichting Musica tambe a honra nan cu e titulo di “Band of the Year 2024”. E fundacion tin criteria bon fiha y conoci pa tur banda di Aruba. Un cuerpo di hurado distribui riba e rutanan di Carnaval a evalua cua ta e banda cu a contribui mas durante Carnaval 70. E criterio ta:
- E banda mester a participa na “Aruba Caiso & Soca Monarch 2024” y/of den “Festival di Tumba 2024”
- E banda mester a participa den paradanan di Carnaval 2024: Lighting Parade Oranjestad, Parada di Jouvert Morning, Parada di Luz na San Nicolas, Parada Grandi di San Nicolas y Grand Parade Oranjestad
- E banda cu miho animacion den paradanan
- E banda su zonido
- Presentacion di e banda su trailer den e paradanan
- E banda mester toca e Groovy Soca of Power Soca ganado di Aruba Caiso & Soca Monarch 2024, sea “Come Together” of “Mash Up” of e Tumba ganado 2024 “Baranca”.
Stichting Musica ta anuncia BAND OF THE YEAR 2024: TSUNAMI
![](https://24ora.com/wp-content/uploads/2024/02/WhatsApp-Image-2024-01-28-at-10.07.35_dca4fbdb-1.jpg)
Tocante Tsunami Aruba
A funda e banda dia 2 di januari di aña 2004. Tsunami ta un di e gruponan mas grandi y conoci na Aruba. E combinacion unico cu influencia latino, caribense y local combina cu e enfoke riba e instrumentonan en bibo a impulsa Tsunami na e nivelnan mas halto di exito. No ta un secreto cu e brassband popular D2U365 a duna luz na un banda hopi prometedor: Tsunami.
E concepto di Tsunami a tuma mas o menos dos aña pa cristalisa. Algun di e personanan clave den brassband tabata ansioso pa haci un cambio den e musica cu nan tabata haci caba. Nan a cuminsa busca diferente alternativa y influencia cu lo a mescla den un estilo unico cu nunca antes Aruba a mira ni tende. E meta principal tabata pa crea un banda cu lo a mira, zona y basicamente haci tur cos den un forma cu nunca antes a haci na Aruba. Tsunami ta un nomber cu ta representa puresa di awa y forsa y ademas e energia di ola. Tsunami su musica y actuacion ta puro mirando cu ta hacie for di curason, e forsa y energia cu nan ta pone den cada actuacion ta contagioso pues wak caya!
Mas premio
Separa di e premionan ey, tambe Tsunami e aña aki a bay cas cu varios otro premio durante e “Aruba Caiso & Soca Monarch Festival:
- 𝗕𝗲𝘀𝘁 𝗗𝗿𝗲𝘀𝘀𝗲𝗱 𝗕𝗮𝗻𝗱:
1st place: Tsunami - 𝗕𝗲𝘀𝘁 𝗰𝗼𝘀𝘁𝘂𝗺𝗲:
1st place: Tsunami (Mitch) - 𝗥𝗼𝗼𝗸𝗶𝗲 𝗼𝗳 𝘁𝗵𝗲 𝘆𝗲𝗮𝗿:
1st place: Tsunami (Big Reckless) - 𝗣𝗼𝘄𝗲𝗿 𝗦𝗼𝗰𝗮:
1st place Tsunami (Galloway jr.)
3rd place Tsunami (Easy B) - 𝗖𝗮𝗹𝘆𝗽𝘀𝗼:
2nd place:Tsunami (Queen Sashah) - 𝗚𝗿𝗼𝗼𝘃𝘆 𝗦𝗼𝗰𝗮:
2nd place:Tsunami (Easy B)