Recientemente nos proximo Minister Plenipotenciario pa Washington, Zulema Dabian-Erasmus tabata na Parlamento di Aruba pa reuni cu e presidente di e ‘hoog college’ aki.
E bishita ta den cuadro di su funcion nobo como Minister Plenipotenciario. Ya pa algun tempo, el a bishita diferente minister-, instancia- y organisacionnan p’asina tin un miho bista kico ta nan deseo pa cu e relacion entre Aruba y Merca. Dabian lo hunga un rol importante den esaki.
Presidente di Parlamento a baha te abou na trapi pa ricibie. Hunto a cana subi trapi y drenta oficina di Presidente di Parlamento.
Presidente di Parlamento, mr. Edgard Vrolijk tambe tabatin su deseo pa cu Merca. E ta desea pa cuminsa e canalnan di comunicacion via Dabian pa cu Senado Mericano.
Kier cuminsa cu un encuentro pa conoce otro y djey mira posibilidad pa reuni anualmente. Ta masha normal cu den Reino ta reuni durante e reunionnan di IPKO y pa Latino America (LATAM) ta hacie via e reunionnan di Parlatino.
Awo ta trahando pa concretisa acuerdonan cu Senado Mericano. Ta spera cu tin 2024 por cuminsa na e prome pasonan p’asina den futuro e encuentronan aki bira algo anualmente.
Tocante Edgard Vrolijk
Na 2000 el a termina su estudio na nivel HBO como maestro di scol specialisa pa educacion di 6 pa 12 aña. Na 2012 el a logra e titulo di Bachelor in Law y e aña ki el a obtene esun di Meester in Rechten. El a drenta arena politico na 2013 obteniendo 586 voto na su nomber. Na 2017, el a aumenta pa yega na 749 voto. Den ultimo eleccion el a obtene 619 voto.
Tocante Zulema Dabian-Erasmus
Ministerio di Asuntonan Exterior cerca e Adviseur Koninkrijkszaken a duna Zulema e conviccion cu e miho manera pa aporta na bienestar y progreso di su dushi isla, ta pa traha na Aruba mes. Den su carera como ambtenaar, Zulema a eherce e funcion di beleidsmedewerker na Departamento di Asuntonan Economico, Comercio y Industria, como na Departamento di Asuntonan Exterior.
Su experticio den gobierno a amplia ora Zulema a traha na Bestuurskantoor prome como Adviseur di Minister y despues como Waarnemend Secretaris di Conseho di Minister, na unda el a experencia di cerca e proceso di decision politico. Zulema ta casa desde 2004 cu Melvin Dabian y ta mama di un yiu muhe (20) studiando na Hulanda y un yiu homber (16) cu tin ambicion pa bira un Student-Athlete den Atletismo.